Sekretari i Përgjithshëm i PS, Damian Gjiknuri, ka reaguar pas deklaratave të kryetares së Komisionit Hetimor Parlamentar për Inceneratorët, Jorida Tabaku, e cila akuzon ish-ministrin socialist se ka firmosur kontratat e inceneratorëve.
Por Gjiknuri në reagimin e tij e konsideron si spekulim një deklaratë të tillë.
“Duket se “lëkundjet tektonike” brenda PD-së midis grupeve “grata” dhe “non grata” e kanë bërë dhe Tabakun të humbasë lidhjen me realitetin. Fillimisht gënjeu publikisht kur tha se kisha firmosur kontratën e inceneratorit të Tiranës.
E konsiderova një lajthitje në kushtet e mungesës së informacionit dhe nuk replikova me zonjën në kohën kur lëshoi një sajesë të tillë. Kontratat janë publike dhe çdokush mund ta shohë që nuk është firmosur asnjëra prej meje. Sot, Tabaku vijoi me të tjera shashka, teksa deklaroi se paskam firmosur koncesion të posaçëm për shitje energjie inceneratorit të Elbasanit për 25 vjet. Sërish mashtrim!”, tha Gjiknuri.
Ai u shpreh se “autorizimi i dhënë kompanisë për prodhim energjie nuk është koncesion, por është detyrim i lindur nga kontrata bazë që kompania kishte firmosur me Ministrinë e Mjedisit. Në përfundim të periudhës 7-vjeçare të koncesionit, kompania bashkë me të drejtën e fituar nga autorizimi i dhënë nga Ministria e Energjisë për prodhim energjie i kalon shtetit shqiptar. Ka ndodhur tashmë fiks kështu. Kompania e inceneratorit të Elbasanit dhe e drejta e saj për prodhim energjie nga djegia e mbetjeve i është transferuar shtetit përmes pushtetit lokal ditën që përfundoi periudha e koncesionit”.
“Me kënaqësi do jem javën e ardhshme në Komisionin Hetimor Parlamentar për t’ia shpjeguar më tej zonjës Tabaku diferencën midis gënjeshtrës dhe të vërtetës”, tha Gjiknuri.
