Nga Boldnews.al
Zgjedhjet e pjesshme lokale të 6 marsit në disa bashki të vendit kanë vënë në lëvizje Komisionin Qendror të Zgjedhjeve. Para pak ditësh, KQZ-ja vendosi se në Vorë votimi dhe numërimi do të bëhet në mënyrë elektronike.
Ndërkohë, në bashkitë e tjera si në Shkodër, Durrës, Dibër, Lushnje dhe Rrogozhinë do të bëhet vetëm identifikimini zgjedhësve në mënyrë elektronike, teksa procesi i numërimit do të vijojë me fletë dhe kuti votimi.
Në zgjedhjet e fundit parlamentare, të 25 prillit 2021, KQZ tenderoi miliona euro për pajisje të identifikimit të zgjedhësve apo edhe pajisje që dërgonin online (video) procesin e votimit dhe numërimit. Ndërkohë, aktualisht KQZ-ja ka filluar përgatitjet të bëjë dy tendera të tjerë, me vlerë 500 mijë euro, por me procedurën me negocim, duke u kërkuar firmave “të preferuara” ose atyre që fituan këto miliona për zgjedhjet e 25 prillit 2021.
Sipas dokumenteve që disponon Boldnews.al, tenderi i parë i hapur nga Celibashi është me objekt “shërbim dhe suport për pajisjet e identifikimit elektronik të zgjedhësve”. Nuk bëhet fjalë për pajisje, por vetëm për suport dhe shërbim. Çka do të thotë se punonjës të një firme private do të mesojnë komisionerët për t’i përdorur. Fondi i këtij tenderi është 29,116,667 lekë, teksa pritet që të shpallet edhe fituesi. “Kërkohen shërbime informatike, konsulencë, zhvillim programesh, internet dhe suport” thuhet në dokumentin që ka siguruar Boldnews.al.
Ndërkohë, në fund të këtij njoftimi të shkurtër shkruhet se “tipi është me negocim, pa njoftim”. Pra, totalisht pa garë kur KQZ-ja u dërgon ftesa disa kompanive. Ose më saktë, kompanisë e cila ka fituar tenderin e parë, atë të blerjes së këtyre pajisjeve. Por, nëse fituesi dihet, përse kjo shumë jepet në formë tenderi?!
Më sipër faktuam se procedura e tenderit të parë ishte me negocim! Por, çfarë procedure tjetër ka hapur KQZ-ja?!
Sipas dokumenteve që disponon Boldnews.al, Celibashi ka shpallur tenderin me objekt “shërbim për ngritjen e sistemit për regjistrimin, transmetimin online të procesit të regjistrimit të votave (VNV)”. Një sistem i ngritur kohë më parë dhe që funksionon më vendet ku numërohet vota nga grupet e numërimit.
Fondi për këtë tender është 19,594,957 lekë, ndërkohë që pritet që të zhvillohet këto ditë. Sipas specifikimeve, kërkohet sistemi i video-mbikqyrjes si dhe aparate për transmetim video. Por, sërish në fund të njoftimit, procedura e ndjekur është “me negocim, pa njoftim”. Pra, KQZ ka pikasur disa kompani, ose atë kompani që fitoi për zgjedhjet e 25 prillit 2021, për t’i dhënë këtë shumë parash.
