Luigj Aleksi, nga Shoqata e ndërtuesve, pohoi para Komisionit Hetimor parlamentar, tha se firmat e ndërtimit janë të detyruar tu çojnë koncensionarëve inertet, pasi në të kundërt nuk jepen leje ndërtimi.
“E dini ju ç´na thotë Bashkia? Shkoni merruni vesh me koncensionarin e inceneratorit për depozitimin e inerteve dhe pastaj hajdeni merrni leje ndërtimi.
Unë nuk e di nëse ka ndonjë ligj apo vendim që na detyron, por kjo po ndodh”, tha Aleksi. Sipas tij, firmat janë të detyruara të paguajnë te koncensionari 7 mijë lekë për ton, duke i trajtuar inertet si të kontaminuara.
“E dini se çfarë do të thotë kjo? Sikur një kompani të gërmojë në mes të Tiranës, është e detyruar që të paguajë për dhera apo për mbetje të kontaminuara. Po si ka mundësi që të na thuhet sot qendra e Tiranës ka dhera të kontaminuara, kur ne jemi rritur në atë zonë”, tha Aleksi.
Ai tha se nga Bashkia na thonë do shkoni të bëni marrëveshje me koncensionarin, dhe bëhet fjalë për dhera që dalin nga gërmime të pastra, të cilat ne i riblemë te koncensionari, pasi këto dhera na duhen për lulishtet.
“Ky është fakt, ne e çojmë dheun në landfill, taksohemi sikur është mbetje, dhe pastaj kur na duhet ne e riblemë. Po paguajmë taksa për dhera sepse i trajtojnë si mbetje”, tha Aleksi.
