Ndeshja kualifikuese për Botërorin e Katar 2022 mes Brazilit dhe Argjentinës më datë pesë shtator të vitit të kaluar zgjati vetëm tetë minuta, duke qenë se autoriteti shëndetësor i Brazilit ndërhyri për shkak se katër lojtarë të albiçelestëve nuk kishin zbatuar protokollin anti-COVID.
Bëhej fjalë për Emiliano Buendia, Emiliano Martinez, Lo Celso dhe Cristian Romero të cilët kishin udhëtuar nga Anglia duke qenë se aktivizohen në Premier League dhe nuk kishin respektuar karantinën katërditore që në atë kohë ishte e detyrueshme për ata që shkelnin në Brazil.
Në këtë formë, autoritet shëndetësore vendosën të ndërhynin dhe të ndërprisnin ndeshjen, ndërsa tashmë ka edhe një vendim për atë sfidë.
Është vendosur që takimi duhet të riluhet dhe nuk do të ketë një rezultat 3-0 në favor të Brazilit, ndërsa lojtarët të cilët nuk zbatuan rregullin do të jenë të pezulluar për dy ndeshjet e radhës.
