Gjykata e Lezhës ka vendosur arrest në burg për Edmond Përdodën, një nga të dyshuarit e vrasjes së rapsodit Kol Marrani dhe mikut të tij Preng Simoni, i cili u arrestua 3 ditë më parë.
Përpara trupës gjykuese, Përdoda pranoi krimin e rëndë të vrasjes së dyfishtë.
Policia ka gjetur edhe armët, dy kallashnikovë, që dyshohet se u përdorën për vrasje. Armët u gjetën të groposura në Lalm Lukaj dhe u zbuluan pas një përgjimi ambiental mes Edmond Përdodës dhe një familjari të tij.
Më herët, për vrasjen e dyfishtë është arrestuar edhe vëllai i Edmondit, Aleksandër Përdoda, si dhe një person i tretë i quajtur Agron Lushi.
