Nga Boldnews.al
Gjashtë kompani u futën në garë për pastrimin e ambienteve e ALBCONTROL, kompanisë shtetërore që menaxhon hapësirën ajrore të Shqipërisë. Por, sipas drejtuesve të kësaj kompanie që njihet për tenderët e shumtë të dyshimtë, asnjë prej tyre nuk i përmbush kushtet për pastrim, sipas direktivave të BE-së.
Fondi i akorduar ishte plot 1 miliardë lekë dhe u denoncua para pak javësh nga redaksia e BoldNews.al. Një fond i ngjashëm me pastrimin e qyteteve nga plehrat. Por, këto lekë do të harxhohen për të pastruar ambientet e vogla të kësaj kompanie, e vendosur në afërsi të Aeroportit të Rinasit. Pas shpalljes së tenderit, ALBCONTROL është tërhequr, duke argumentuar se “asnjë prej firmave në garë nuk përmbushën kushtet”.
Sipas dokumenteve që disponon BoldNews.al, ALBCONTROL që drejtohet nga Hantin Bonati, një i besuar i ministres Belinda Balluku, ka anuluar tenderin me objekt “shërbimi i pastrimit të ambienteve të Albcontrol sha”. Fondi për këtë tender ishte plot 84.175.068 lekë pa TVSH, por me TVSH shuma shkon në plot 1 miliardë lekë të vjetra. Në pikën 6 të dokumentit të mësipërm, Bonati shkruan se arsyet e anulimit erdhën pasi “në procedurat me një fazë nuk është dorëzuar asnjë ofertë e përshtatshme”. Më tej ka dhënë edhe një informacion shtesë, sipas së cilit, ofertat kanë qenë jo të duhurat, pavarësisht se morën pjesë 6 kompani. Më saktësisht, sipas dokumenteve, thihet se në këtë tender morën pjesë firmat “Alpen Pulito”, “Alko-Implex General Construction”, “Clean Fast”, “Diol-Al”, “Albstone” dhe “Pastrime Silvio”. Pra, kompani që kanë fituar tender të majmë nga institucionet shtetërore. Por, për Bonatin nuk ofrojnë shërbimin që kërkon!
Para pak javësh, BoldNews.al hulumtoi dokumentet e pastrimit nga ALBCONTROL, teksa firma shtetërore kërkonte pastrimin e tualeteve dhe dyshemeve industriale, rezinë, me pllaka, parketi dhe moketi të të gjitha ambienteve. “Pastrimi i WC-ve, aksesorëve, dyshemeve, pllakave dhe mureve të tualetit dhe dezinfektimi i tyre brenda dhe jashtë. Kontrolli dhe zëvendësimi i materialeve të konsumit në WC (letër higjienike, letër dhe likuid duarsh)” janë disa nga kërkesat.
ALBCONTROL kërkon fshirjen me fshesë me korrent një herë në ditë, ndërkohë që solucionet të jenë të markës CE. “Larje me solucion dhe lucidim për dyshemenë, minimumi një herë në ditë (uji që do të përdoret për larje, të përgatitet me solucion larës pllakash dhe lucidus konform normave CE). Kërkohet që punonjëset e të dyja turneve, duhet të fokusohen në pastërtinë e korridoreve dhe ambienteve të përbashkëta dhe tualeteve. … pastrimi i merimangave nga brenda dhe jashtë” thuhej në dokumentet e tenderave.
