Komisioni Hetimor për Inceneratorët ka nisur sot marrjen në pyetje të dëshmitarëve.
Të parët që janë thirrur janë tre administratorët e inceneratorëve të Tiranës, Fierit dhe Elbasanit.
Arjola Kodra është pyetur në lidhje me njohjet me Klodian Zoton, Stela Gugalljan dhe Mirel Mërtirin.
“Nuk jam e detyruar të kontaktoj me nënkotraktorë sepse kam një staf që kontaktoj. Unë kontaktet nuk i kam të drejta me nënkotraktorët, komunikoj nëpërmjet stafit tim. Unë s’e kam memorizuar këtë pjesën e takimit”, tha ajo.
Pyetur nga kryetarja e këtij komisioni Jorida Tabaku nëse ka pasur njohje me kryeministrin Edi Rama apo ministrin Damian Gjiknuri, Kodra tha se i njeh vetëm si politikanë dhe nuk ka pasur asnjëherë kontakt me ta, as ajo as familjarët e saj.
Arjola Kodra është administratore e Integrated Energy, e cila tha se ishte në këtë detyrë që prej marsit të vitit 2019.
E pyetur nga kryetarja e Komisionit, Jorida Tabaku mbi takimin e fundit me Klodian Zoton dhe Stela Gugallen, Kodra tha se nuk e mbante.
Ndërkohë që deputetët e PS-së kërkuan që gjuha e përdorur nga Tabaku të ishte më e butë, dhe të mos i hakërrehej Kodrës.
“Hera herës mu krijua përshtypja sikur ju hakërruat, pra mënyra e drejtimit që ju keni… ju vë në dukje ndaj të gjithë anëtarëve, është shumë e rëndësishme edhe si pyesim. Këtë doja të sillja në vëmendjen tuaj”, tha Eduart Shalsi.
Kodra deklaroi se të gjitha përgjigjet e kërkuara nga Komisoni Hetimor do të jepeshin me shkrim, pasi nuk mund ti memorizonte të gjitha. Administratorja e kompanisë pranoi se për të kryer investimin do të duhej që të merrnin kredi, ndërkohë që Tabaku pyeti se cili ishte kolaterali që kompania kishte lënë.
Administratorja pranoi se ajo ka formim juridik, dhe nuk ka pasur eksperienca të mëparshme në fushën e përpunimit të mbetjeve.
