Presionet përmes kredive në Shqipëri janë kthyer në makth dhe stres për qytetarët, të cilët janë tërësisht të pambrojtur, jo vetëm nga bankat por dhe ana e institucioneve mikrofinanciare.
Tashmë është kthyer e modës që këto filiale mikrofinanciare, arrijnë që të blejnë në bankat e niveleve të dyta, borxhet e qytetarëve dhe më pas me anë të përmbaruesve privatë të ushtrojnë presion tek qytetarët për të shlyer kredinë por me një përqindje disa fish më të lartë.
Janë të shumtë qytetarët nga çdo cep i vendit që denoncojnë çdo ditë këto skandale dhe mashtrime që bëhen nga ana e oficerëve të institucioneve të mikrokredisë.
Përmbaruesit privat përmes një letre drejtuar të gjitha institucioneve shtetërore kanë denoncuar një skemë mashtrimi dhe përfitimi që individ të ndryshëm në bashkëpunim me bankat grabisin qytetarët që ndër vite janë debitor.
Si funksionon skema e mashtrimit
‘Një shoqëri mikrofinanciare blen nga bankat e nivelit II borxhin/kredinë e marrë në 2006, 2007, 2008 apo 2009 nga një shqiptar i thjeshtë dhe pasi e kërkon disafish me shantazh, e vendos atë mes dy zgjedhjeve të detyruara: O të paguajë disafishin e borxhit të vjetër, ose të marrë kredi të re dhe të kthehet në një borxhli modern të viteve 2019, 2020, 2021 apo 2022!’, thuhet në një njoftim të Dhomës së përmbaruesve.
Por kjo skemë mashtrimi nuk po dëmton vetëm qytetarët, por ëhstë kthyer në bumerang edhe për bankat e nivelit të dytë
‘Mashtrimi po kthehet në “bumerang” për vetë sistemin bankar dhe rrezikon të përfshijë gjithë sistemin shoqëror në vend. Bankat e nivelit të dytë nuk kanë më mundësi praktike të përballojnë mijëra sekuestrimet që dalin nga Kutia Postare me Nr. 7469.
Mund të jenë 10 mijë, 30 mijë apo 100 mijë shqiptarë të prekur nga marifeti me kuti postare. Sot nga bankat konfirmohet shifra 4060 llogari bankare të sekuestruara që mbajnë adresën: Kutia Postare Nr. 7469’, thuhet më tej në njoftim.
Kujtojmë që këto skandale edhe pse janë denoncuar shpesh nga qytetarët, deri më tani nuk ka reaguar asnjë institucion për të mbrojtur taksapaguesit nga këta mashtrues që janë kthyer në makth për çdo kreditor.
