Kryetari i Grupit Parlamentar të Partisë Socialiste, Taulant Balla, u pyet sot nga mediat në lidhje me hetimet që po bëhen për dosjen “Toyota Yaris”, për të cilën ai është akuzuar nga kreu i PD, Lulzim Basha.
Balla tha se Basha po “korr atë që mbolli” me akuzat që bëri për të cilat u dënua për shpifje. Balla thotë se tashmë Basha së bashku me Berishën do të paguajnë kostot e atyre se çfarë kanë bërë në të kaluarën.
“Kemi qenë në këtë korridor të Kuvendit të Shqipërisë, më pak se 4 vite më parë, në 2018 ose 2019 ku zoti Basha lëshoi një akuzë që u provua nga Gjykata e Krimeve të Rënda në Tiranë se ishte gënjeshtër. E vërteta vonon por nuk harron. Sot jemi në kushtet ku thuajse gjithë kjo histori është zbardhur. Personi që më ka akuzuar mua tashmë është në listën e personave që kanë dijeni për këtë çështje. Basha duhet të paguajë kostot. Ishte gënjeshtër, Luli me dijeni apo pa dijeni dëmtoi një aksion policor”, tha Balla.
Lidhur me dy reformat që priten të diskutohen me opozitën, ajo territoriale dhe zgjedhore, Balla tha se për Territorialen po propozohen 8 anëtarët, ndërsa për reformën Zgjedhore duhet diskutuar me Komisionin e Posaçëm.
“PS do të ketë tetë anëtar në secilën prej komisioneve. Bashkëkryetar i komisionit do të jetë Damian Gjiknuri nga PS. Sot kam diskutuar me anëtarët e grupit për përbërjen e komisionit territorial, për ngritjen e këtij komisioni. Ajo që dua të them është që të propozojmë qoftë bashkëkryetarin, qoftë kryetarin tjetër për të filluar punën. Mandati do të jetë 6 mujor dhe besoj se janë të mjaftueshme për të gjitha propozimet.
Nuk ka pasur negociata për këto çështje. Është ndërgjegjësimi edhe i deputetëve dhe i grupit parlamentar të grupit më të madh të opozitës. Ne menduam t’i mbështesim. Unë nuk dua të flas më fare për këtë çështje se është një kompetencë që i takon Komisionit të posaçëm të Reformës Zgjedhore. Të gjitha çështjet ti drejtohen Komisionit të Posaçëm se ka marrë detyrën për të marrë të gjitha propozimet. Ky 6 mujor të përdoret në funksion të të gjithë rekomandimeve të raporteve të OSBE ODIHRIT qoftë për zgjedhjet e 25 prillit apo për zgjedhje të tjera dhe në këtë këndvështrim, gjithmonë e kam thënë që komisioni të përmbledhë dhe ndryshime që kanë të bëjnë me legjislacionin për ligjin për parti politike dhe financimin e partive politike”, tha Balla.
