Java që sapo u mbyll shënon një rënie të theksuar të rasteve të reja me Covid-19 në Shqipëri, por jo përsa i takon fataliteteve.
Referuar shifrave zyrtare, nga data 6 deri në 12 shkurt, në Shqipëri janë evidentuar 4043 raste të reja me Covid, ndërkohë që kanë humbur jetën 34 persona.
Krahasuar me një javë më parë, numri i fataliteteve ka pësuar një rritje, nga 32 në 34, ndërkohë që rastet e reja kanë rënë nga rreth 9 mijë në 4043, me një ulje rreth 60 %.
Në total në të gjithë vendin numërohen 9316 raste aktive me Covid, nga të cilat 3125 raste regjistrohen në Tiranë, që mbetet Bashkia me numrin më të lartë të të infektuarve, edhe pse ka një reduktim me të paktën 2 herë krahasuar me një javë më parë.
Pas Tiranës, Fieri rezulton qarku më i prekur me 1296 raste dhe më pas vjen Vlora me 786 raste, Gjirokastra me 765 dhe Shkodra me 744 raste aktive.
Dibra rezulton qarku me numrin më të ulët të rasteve aktive, vetëm 57 të tilla, ndërkohë që Kukësi numëron 214 raste aktive.
Krahasuar me 1 javë më parë, situata në spitalet Covid është e stabilizuar, ndërsa deri pasditen e së shtunës, trajtim spitalor merrnin 130 pacientë, 18 prej të cilëve ndodhen në gjendje të rënduar.
