Duke përdorur faqen zyrtare të Partisë Demokratike në rrjetin social “Facebook”, Lulzim Basha ka vijuar akuzat në drejtim të ish-Kryeministrit Sali Berisha dhe kandidatëve të koalicionit “Shtëpia e Lirisë”.
Pak orë pasi Berisha prezantoi në Dibër kandidatin Premtim Kryemadhi, Basha në reagimin në faqen zyrtare të PD në rrjetin sociale, shkruan se “non grata poshtëron dibranët. Gruaja e kandidatit të tij, mbrojti ministrat e Ramës që blenë zgjedhjet. Nëse zgjedh Metën dhe Berishën, mban Ramën”.
Sipas Bashës, kandidatët e shtëpisë së Ilirit, nuk përfaqësojnë demokratët, ata përfaqësojnë korrupsionin që po e mban peng Shqipërinë.
“Dibranët e dinë mirë se si gruaja e kandidatit të Shtëpisë së Ilirit, nuk çoi para drejtësisë ministrat dhe zyrtarët e Edi Ramës që blenë dhe shantazhuan dibranët për vota.
Demokratët dhe qytetarët dibranë, janë poshtëruar nga Berisha&Meta, të cilët përzgjodhën si kandidat pikërisht burrin e prokurores Belina Zeneli, e cila përveç dosjes 184, nuk i ka dhënë zgjidhje ligjore 33 procedimeve penale, si dhe nuk ka kryer asnjë veprim verifikimi në lidhje me 300 kallëzime të bëra nga qytetarët dibranë, duke i lënë ata pa drejtësi për hallet e tyre.
Demokratët dhe qytetarët dibranë nuk mund të pranojnë kurrë njerëz të tillë. Ata e dinë se nëse zgjedhim Berishën dhe Metën, mbajmë Ramën”, shkruan ai.
