Edmond Përdoda, 39 vjeç, i cili ishte shpallur në kërkim për vrasjen e dyfishë të Preng Simonit dhe Kol Murranit, rreth dy vite më parë në Lezhë, është arrestuar.
Operacioni për kapjen e tij i koduar “Lalm i Ri”, u krye nga Policia e Lezhës, në bashkëpunim me Forcën Speciale RENEA dhe erdhi pas “informacioneve të marra në rrugë operative”, njoftoi policia.
Edmond Përdoda, 39 vjeç, banues në Lalm-Lezhë, ka qenë i dënuar më parë në shtetin grek, për veprën penale “Vrasja”, dhe në Shqipëri, për armëmbajtje pa leje dhe shkatërrim prone.
Gjatë kontrollit të banesës së tij, shërbimet e Policisë gjetën dhe sekuestruan në cilësinë e provës materiale një armë zjarri kallashnikov, municion luftarak dhe një sasi baruti.
Edmond Përdoda ishte shpallur në kërkim, pasi Prokuroria e Rrethit Gjyqësor Lezhë ka lëshuar urdhër ndalimi ndaj tij, për veprat penale “Vrasja në rrethana të tjera cilësuese”, kryer në bashkëpunim dhe “Armëmbajtja pa leje”. Ai akuzohen se në bashkëpunim me vëllanë e tij, Aleksandër Përdoda (i arrestuar me parë), kanë vrarë me armë zjarri Kol Murranin dhe Preng Simonin.
Vëllai i 39-vjeçarit Edmond Përdoda, Aleksandër Përdoda, nuk i ka pranuar akuzat për vrasje.
