Nga Boldnews.al
Struktura e Posaçme Kundër Korrupsionit (SPAK) po kryen prej disa muajsh një hetim penal ndaj komisioneres së Vetingut, Etleda Çiftja, nën dyshimet se ajo ka kryer disa vepra penale, përfshirë “deklarim të rremë të pasurisë”, “fshehje e të ardhurave”, “falsifikim i dokumentave” dhe “pastrim parash”.
Shoqata e Avokatëve Anti-Korrupsion ka vënë në dispozicion të prokurorëve specialë një seri të dhënash, të cilat ngrenë dyshime se Çiftja nuk ka burime të ligjshme për pasurinë e saj.
“Boldnews.al” ka ngritur më herët dyshimet se Etleda Çiftja mund të jetë përfshirë në veprat penale që lidhen me pasurinë, mashtrim në kredi dhe pastrim produktesh të veprës penale.
Në hetim e SPAK-ut janë përfshirë, krahas rasteve të përmendura nga redaksia, edhe verifikimi i burimit financiar të Etleda Çiftes e bashkëshortit të saj, për krijimin e pasurive të deklaruara në formularin fillestar të pasurisë e në deklaratat vijuese.
Dyshimet mbi burimin e parave
Etleda Çiftja është emëruar anëtare e Komisionit të Pavarur të Kualifikimit në Qershor 2017 dhe ka dorëzuar formularin e pasurisë për herë të parë në Korrik të po atij viti.
Sipas të dhënave të vetëdeklaruara, Çiftja rezulton se ka shpenzuar për pasuri të paluajtshme e të luajtshme, si vijon;
Në vitin 2006, kjo shtetase ka kryer shpenzime vlerën prej :
– 300.000 lekë për blerje Toke Arë, sip 1440 m2;
– 15.000 Euro për blerje Toke Arë, sip 3 440 m2’
– 250.000 lekë, Automjet v. 2005;
– 200-250 Euro/muaj këst kredie;
– 42 864 USD, blerë Apartament banimi, me sipërfaqe 70.80 m2, në vitin 2006 me Kontratë Sipërmarrje me Nr.3428 Rep., dhe me Nr.2052 Kol, datë 08.09.2006, Noter Eriketa Kokoli, blrë me çmim preferencial në qendër të Tiranës, konkretisht në Kompleksin Halili.
Sipas formularit të pasurisë, burim për krijimin e kësaj pasurie në bashkëpronësi me bashkëshortin e saj, kanë shërbyer të ardhurat nga Paga e saj dhe e bashkëshortit.
Kallëzuesi ka analizuar pikërisht këto të dhëna, duke i kërkuar SPAK-ut që të kryejë hetime penale kundër Etleda Çiftjas.
Në vitin 2006, komisionerja e Vetingut ka deklaruar shpenzime të cilat kanë vlerën e përafërt prej rreth 3.000.000 lekë dhe 42 864 USD, pa përfshirë kostot e jetesës, udhëtime, mobilime, pushime etj.
“Duke ju referuar CV-së së kësaj shtetase, të publikuar në faqen zyrtare të Komisionit të Pavarur të Kualifikimit, rezulton se kjo shtetase ka nisur karierën në vitin 2001 si ndihmëse në një zyrë avokatie ‘pa emër’ (për të cilën në CV e kësaj shtetasje nuk jepet asnjë e dhënë), si dhe nuk ka deklaruar sa ka qenë paga e saj si dhe nëse janë paguar detyrimet tatimore mbi këtë pagë”, thuhet në dokumentin e dorëzuar në SPAK.
“Më pas, deri në vitin 2009, Çiftja ka punuar pranë Subjektit “Egnatia O. Albania”, si këshilltare ligjore dhe në lidhje me këtë pozicion pune nuk ka deklaruar pagën dhe taksat”.
Pra, në analizë të asaj që është deklaruar, rezulton se Etleda Çiftja, në periudhën e punësimit nga viti 2001 deri në vitin 2006, ka mundur që përveç shpenzimeve të jetesës së saj;a) të ketë kursyer edhe vlerën prej 3.000.000 lekë, dhe 42 864 USD, me të cilat ka kryer investimet/blerjet e vitit 2006; b). si dhe ka përballuar pagesën e kësteve të Kredisë
Sa më sipër,-thuhet në kallëzimin e Shoqatës së Avokatëve Antikorrupsion- “deklarimi i saj krijon dyshime të forta mbi burimin e pajustifikuar të krijimit të pasurive të deklaruara nga Znj.Çiftja, fakt i cili përbën elementët e veprës penle të “Fshehja e të ardhurave” dhe “Falsifikim i dokumentave”, sipas neneve 257/a dhe 186 të K.Penal”.
Në vijim, kallëzuesi ka kërkuar nga SPAK që të hetojë Etleda Çiftjan edhe për mënyrën se si ka blerë sipërfaqet e tokës në Kavajë dhe se si ka marrë një kredi në vlerë 35 mijë euro.
Në bazë të dokumentave të siguruar nga kallëzuesi, ai deklaron se “rezulton e provuar që znj. Çiftja ka blerë një sipërfaqe prej 3.440 m2, në vlerën prej 300.000 lekë, ndërkohë që në Deklaratën e Pasurisë para fillimit të detyrës, kjo sipërfaqe tokë është deklaruar sikur gjoja është blerë në shumën prej 50.000 Euro dhe për blerjen e saj ka marrë Kredi Bankare prej 35 000 Euro dhe 15.000 Euro Kursime nga Paga e saj”. Duket qartazi “deklarimi i rremë” i bërë nga Znj.Çiftja, thekson kallëzuesi.
