Ish-Kryeministri Sali Berisha ka dënuar terrorin që po ushtrohet nga qeveria mbi banorët e rrugës 5 Maji sot, të cilët po dëbohen dhe po shtëpitë po iu shemben.
Për përpjekjet e tyre, protestën që kanë bërë edhe sot, Berisha i ka konsideruar heronj.
“Terror policesk ndaj banorëve të “5 Majit”! Ata po mbrojnë si heronj shtëpitë e tyre!”, shkruan Berisha duke publikuar pamjet e mëngjesit të sotëm, ku policia forcërisht thyen dyert e banesave.
Pak ditë më parë, duke mbështetur revoltën e banorëve përpara Kuvendit të Shqipërisë, Berisha argumentoi se ata të gjithë të drejtën ligjore për t’u dëmshpërblyer për posedim prone.
“Edi Rama, Erion Veliaj, Artan Lame e kanë përcaktuar atë zonë e cila nuk ka asnjë lidhje me dëmtimet nga tërmeti dhe e kanë bërë këtë për zgjedhje, në mënyrën më hileqare, të turpshme. Kanë gjetur zonën që ka më pak shtëpi të legalizuara dhe u bien me buldozier. Por ky është një shkelmim i ligjeve të vendit. Shtëpitë ata i kanë aty që para 20 vitesh. Shtëpitë e tyre duhet të ishin legalizuar automatikisht”, deklaronte Berisha.
