Emisioni Stop denoncoi rastin se si një qytetari që ndërroi jetë pas sëmundjes së rëndë të tumorit, pasuria iu grabit nga shoku i tij Ylli Selaj në bashkëpunim me noteren Majlinda Lleshi.
Denoncimi u bë nga bashkëjetuesja e të ndjerit, e cila tha se Arian Voci kishte nxjerrë në shitje shtëpinë dhe makinën me qëllim që lekët t’i përdorte për t’u mjekuar nga sëmundja e rëndë. Me procedurat për shitjen e tyre do ta ndihmonte shoku i tij Ylli Selaj.
Por fatkeqësisht, Arian Voci ndërroi jetë për shkak të gjendjes së rënduar. Stop zbuloi se ka disa elementë të dyshimtë në kontratën noteriale të shitjes së makinës dhe shtëpisë. Bashkëjetuesja u shpreh se gjithçka është falsifikuar kur i ndjeri jetonte ditët e fundit në spital.
Në kontratën e shit-blerjes së makinës në 6 Janar 2021 thuhet se Ariani Voci është paraqitur personalisht në zyrën e noteres Majlinda Lleshi, por në të njëjtën ditë ai ishte në spital i operuar një ditë më parë.
Një paqartësi e tillë është edhe në kontratën për shitjen e shtëpisë. Po kështu, kontrata e shit-blerjes së shtëpisë mban datën 19 Mars 2021, por ajo nuk ka të bashkëngjitur një raport mjeko-ligjor, që provon aftësinë e Arian Vocit. Këtë shkelje e pranon edhe kryetarja e Dhomës së Noterëve Mimoza Sadushi.
Dhe paratë nga shitja e banesës, 60 milionë Lekë të vjetra, rezulton se i ka marrë pikërisht Ylli Selaj, shoku i të ndjerit, i cili thotë se viktima i kishte borxh një pjesë të parave dhe ia kishte lënë amanet me gojë, fakt për të cilin bashkëjetuesja e Arian Vocit nuk ishte në dijeni.
Pas këtij rasti flagrant grabitjeje, emisioni “Stop” bëri padi penale në Prokurorinë e Tiranës ndaj noteres Majlinda Lleshi dhe shtetasit Ylli Selaj.
