Presidenti Ilir Meta njoftoi sot se ka firmosur kallzimin penal që do të depozitohet në SPAK dhe Prokurorinë e Tiranës lidhur me falsifikimin e provave që Kuvendi ka depozituar në Gjykatën Kushtetuese në procesin për shkarkimin e Kreut të Shtetit.
Meta tha se kallzimi penal përfshin strukturat e Kuvendit, pëgjegjëse për hartimin e akteve dhe dokumenteve, të cilat janë fallsifikuar në bashkëpunim.
Këshilltari i Presidentit, Bledar Dervishaj, duke sqaruar procesin, tha se Kuvendi depozitoi disa akte, pa ia kërkuar askush, duke tentuar të manipulojë procesin.
“Provat e manipulimit dhe falsifikimit janë mëse të dukshme”, tha Dervishaj. Ai tha se përveç veprës penale të falsifikimit, mund të kemi edhe atë të ndikimit të paligjshëm, pra kush i detyroi zyrtarët apo ish-zyrtarët që të falsifikojnë provat.
“Në këtë vepër penale mund të jenë përfshirë 1 apo disa zyrtarë të Kuvendit, drejtues apo ish-drejtues politikë, ndaj edhe ne si institucion i jemi drejtuar edhe SPAK për të hetuar këtë skandal”, tha Dervishaj.
Në anën tjetër, Presidenti tha se ky krim, ky falsifikim, tregon shumë qartë jo vetëm se si ka funksionuar Kuvendi njëpartiak i deri para 25 prillit, por edhe është një dramë se si po funksionon edhe ky Kuvend.
“Themelet e Republikës janë tronditur rëndë”, tha Meta. Sipas tij, kjo është hera e parë që ndodh kur një institucion si Kuvendi falsifikon prova dhe fakte që i depoziton në Kushtetuese.
Meta tha se kjo procedurë mafioze falsifikimesh është një grusht shteti që u organizua kundër Kreut të Shtetit.
“Çfarë garancie kemi ne, kur këta jo vetëm falsifikojnë letrat për ti rrëmbyer Presidentit anëtarët e Kushtetueses, por edhe duan të shkarkojnë Presidentin po me falsifikime. Çfarë garancie kemi ne që pronat dhe hipotekat, nuk falsifikohen? Çfarë garancie kemi ne që ligjet që miratohen nuk falsifikohen gjatë zbardhjes? Pse kjo urgjenca e manipulimit të provave, apo se duhej ti dilte fjala atij ish-deputetit që grabit pronat në Vlorë e Ksamil, që Presidenti duhej të shkarkohej ditën e hënë”, tha Meta.
