Pronari i një lokali në Elbasan është arrestuar nga policia, pasi në këtë biznes ushtroheshin lojëra fati të paligjshme.
Po ashtu, u proceduan penalisht 10 persona, klientë në lokal.
“Bazuar në informacionet e marra në rrugë operative, shërbimet e Komisariatit të Policisë Elbasan, në bashkëpunim me shërbimet operacionale të DVP Elbasan, kapën dhe arrestuan në flagrancë shtetasin: A.P., 57 vjeç, banues në lagjen “5 Maji”, Elbasan, pronari i lokalit ku ushtrohej veprimtaria e kundërligjshme e lojërave të fatit. Gjithashtu u proceduan penalisht në gjendje të lirë shtetasit V.T., D.S., M.G., Sh.H., P.B., S.D., A.B., K.C., B.K. dhe B.L., klientë në lokalin e shtetasit A. P., të cilët u kapën në flagrancë duke ushtruar aktivitetin e kundërligjshëm të lojërave të fatit”, njoftoi policia.
Në cilësinë e provës materiale u sekuestruan një tavolinë pokeri, çipsa, zare, letra bixhozi, lekë dhe sende të tjera, ndërsa materialet u referuan në Prokurorinë pranë Gjykatës së Shkallës së Parë Elbasan, për veprime të mëtejshme, shtuan të njëjtat burime.
