Në një kohë kur Saimir Tahiri, ish-ministri kampion i Edi Ramës, ndodhet në burg, atje ku duhet të vuajë 3.4 vite heqje lirie bazuar në vendimin e Apelit të GJKKO, Kryeministri i pashqetësuar ka zgjedhur të relaksohet në fundjavë në Itali.
Tahiri u dënua për shkak të lidhjeve me Habilajt dhe favorizimin e tyre në trafikun e drogës, në kohën kur vendi u kanabizua si kurrë më parë, ndërsa gjithçka që ndodhte kalonte në heshtjen e Kryeministrit, diplomatëve, apo shumë drejtuesve të institucioneve të sigurisë.
Mediat italiane kanë publikuar fotot, ku Edi Rama shfaqet i shoqëruar nga këshilltari i tij, Endri Fuga.
Kryeministri shqiptar është parë ditën e djeshme teksa po shëtiste nëpër lagjen San Pellegrino në Itali.
I veshur me një kostum të errët, i shoqëruar nga familjarët, ai u ndal në një restorant, shkruajnë mediat italiane.
Sot ai do të drejtojë një delegacion shqiptar në takimin që do të zhvillohet me drejtuesin e disa universiteteve në Itali.
I pranishëm do të jetë edhe Paolo Orneli, këshilltar rajonal për zhvillimin ekonomik, tregtinë dhe zanatet, universitetet, kërkimin shkencor, start-ups dhe inovacionin.
