Kolegji i Posaçëm i Apelimit shtyu sot seancën për dhënien e vendimit për prokurorin Hysen Keta.
Kolegji i Posaçëm i Apelimit zhvilloi më 26 janar të këtij vitit seancën gjyqësore publike të çështjes që i përket ankimit të subjektit të rivlerësimit Hysen Keta kundër vendimit të Komisionit të Pavarur të Kualifikimit.
Kryesuesi i seancës, bëri me dije se me kërkesë të Kolegjit, Drejtoria e Përgjithshme e Tatimeve dhe Drejtoria Rajonale Tatimore Tiranë kanë dërguar informacion shtesë në funksion të shqyrtimit të çështjes, informacion, i cili i është përcjellë subjektit të rivlerësimit. Pasi subjekti i rivlerësimit konfirmoi njohjen me aktet e dërguara nga organet tatimore, kërkoi që këto akte të pranohen në cilësinë e provës, nga trupi gjykues. Pasi u tërhoq për konsultim, trupi gjykues vendosi të pranojë në cilësinë e provës kërkesat që Kolegji u ka dërguar organeve tatimore dhe përgjigjet e sjella prej tyre.
Trupa gjykuese e KPA vendosi të shtyjë seancën për arsye objektive për dhënien e vendimit për prokurorin Hysen Keta. KPK vendosi më 20 korrik 2019 shkarkimin nga detyra të subjektit të rivlerësimit, Hysen Keta, me funksion prokuror/drejtues pranë Prokurorisë së Gjykatës së Rrethit Gjyqësor Përmet.
Prokurori Keta e ka nisur karrierën e tij në vitin 1979 dhe përveç pozicionit si prokuror, ai ka punuar për një periudhë edhe si avokat. Për më shumë se një dekadë, ai e ka ushtruar funksionin në Prokurorinë e Përgjithshme, ndërsa në vitin 2015 u transferua me dekret të Presidentit në Prokurorinë e Tiranës.
Në vitin 2017, Keta u komandua drejtues i Prokurorisë së Rrethit Gjyqësor të Përmetit, detyrë të cilën vazhdon ta kryejë edhe aktualisht.
