Komisioni i Rithemelimit ka ngritur grupet e punës në të gjashtë bashkitë ku do të mbahen zgjedhjet e pjesshme vendore më 6 mars për Kryebashkiak.
Si pjesë e koalicionit “Shtëpia e Lirisë”, i cili në KQZ u regjistrua nga LSI dhe PDK, e gjithë fushata do të drejtohet nga anëtarët e Komisionit të Rithemelimit, ndërsa do të mbështetet nga dy subjektet që konsiderohen si aleatët e kandidatëve të përzgjedhur nga anëtarësia e PD.
Boldnews.al ka mësuar se në Bashkinë e Durrësit, grupet e punës përbëhen nga deputeti Oerd Bylykbashi, i cili do të jetë edhe drejtues i fushatës. Gjithashtu po në Durrës janë deputetët Albana Vokshi dhe Agron Shehaj, si dhe Ivi Kaso dhe Enno Bozdo. Për bashkinë e Durrësit pritet gjithashtu një angazhim i strukturave jo vetëm të demokratëve, por edhe i LSI.
Në Bashkinë e Shkodrës si drejtues është përzgjedhur deputeti Belind Këlliçi, ndërsa në grupin e punës përfshihen edhe Edith Harxhi dhe Aldo Bumçi. Gjithashtu në këtë bashki pritet një angazhim i kreut të PDK, Nard Ndoka.
Në Bashkinë e Vorës, fushata do të drejtohet nga deputeti Flamur Noka, i cili ka monitoruar edhe procesin e përzgjedhjes së kandidatit për kryebashkiak nga anëtarësia, ndërsa Bashkia e Lushnjes, i është besuar deputetit Tritan Shehu. Po kështu në Lushnje pritet një angazhim i strukturave të LSI, krahas atyre të PD, që janë pozicionuar në mbështetje të Komisionit të Rithemelimit.
Ndërkohë për Bashkinë e Dibrës si drejtues fushate do të jetë Çlirim Gjata, ish-sekretar për Çështjet Ligjore në PD, i cili gjithashtu ka monitoruar procesin e përzgjedhjes së kandidatëve për kryebashkiak. Mësohet se në këtë bashki pritet një suport edhe nga LSI, një prej partive që përfshihet në koalicionin “Shtëpia e Lirisë”.
Ndërkohë, fushata për të 6 bashkitë do të drejtohet nga ish-Kryeministri Sali Berisha, i cili ka zgjedhur Bashkinë e Durrësit, për të nisur turin e takimeve me elektoratin në prezantimin e kandidatëve.
