Gjatë javës që sapo u mbyll ka pasur një rënie të theksuar të rasteve të reja me Covid-19 krahasuar me 3 javët e fundit të pandemisë, por numri i fataliteteve është pothuajse në të njëjtat kuota.
Referuar shifrave zyrtare, gjatë kësaj jave janë evidentuar 6883 raste të reja, ose pothuajse 50 % më pak se 3 javët e mëparshme.
Ndërkohë kanë humbur jetën 39 pacientë, një shifër kjo pothuajse e njëjtë me fatalitetet që kanë ndodhur në Shqipëri përgjatë javëve të mëparshme.
Në spitalet Covid, bazuar në shifrat zyrtare, po marrin trajtim 133 pacientë, nga të cilët 16 janë në gjendje të rënduar shëndetësore.
Sipas të dhënave të raportuara, trajtim spitalor po marrin edhe moshat e reja, pa sëmundje bashkëshoqëruese. E ndërsa në Shqipëri po dominon varianti Omicron i Covid-19, ekspertët e shëndetësisë shprehen se ka një qarkullim edhe të variantit Delta, sikundër ka pasur raste të mbivendosjes së gripit stinor me infektimin nga Covid, duke rënduar gjendjen e pacientëve, veçanërisht moshat e treta.
