Presidenti Ilir Meta përmes një mesazhi, të bërë publik në rrjetet sociale, shprehet se qëndrimi i tij ka qenë gjithmonë koherent lidhur me ndryshimet Kushtetuese, ndërsa thekson se ajo nuk mund të ndryshohet pa referendum.
Deklarata e Kreut të Shtetit duket se ka lidhje me ndryshimet kushtetuese, të cilat janë depozituar në Kuvend, një lidhur me zgjatjen e afateve të organeve të vetting, si dhe 3 nisma të depozituara nga opozita, të cilat sërisht synojnë ndërhyrjen në dokumentin themeltar të shtetit.
“Koherenca ime ka qenë absolute për demokracinë, pluralizmin, për integrimin europian dhe për mbrojtjen e Kushtetutës, që nuk mund të ndryshohet asnjëherë pa referendum.
Unë gjithmonë i kam shërbyer këtyre kolonave shumë të rëndësishme, që kanë të bëjnë më interesin e të gjithë qytetarëve shqiptarë”, thekson Presidenti, i cili po përballet me një proces shkarkimi në Gjykatën Kushtetuese, pasi akuzohet nga mazhoranca e Kryeministrit Edi Rama për shkelje të Kushtetutës.
Në vijim të mesazhit në rrjet, Meta thekson se koherenca e tij ka qenë absolute dhe është shumë krenar për këtë.
