Erion Veliaj, kryebashkiak i Tiranës, tha në një intervistë për News24, se në 2 mars nuk do të ketë zgjedhje për kreun e FSHF.
Veliaj tha se Armando Duka po të ketë burrëri duhet të dalë dhe të thotë “boll kam vjedhur dhe të tërhiqet”.
“Nuk besoj se do të ketë zgjedhje për kreun e FSHF. Erdhi edhe Ceferin dhe tha se do të sillte një ekip në Tiranë për të evidentuar parregullsitë e zgjedhjeve të deritanishme. Ndaj në kushte të tilla nuk mund të ketë proces zgjedhor. Por gjithçka do të varet nga burrëria e Dukës, i cili për herë të parë në 20 vjet duhet të tërhiqet dhe të pranojë një proces të rregullt”, tha Veliaj.
Sipas tij, FSHF nuk mundet më të jetë një ishull i pakontrolluar nga askush.
“Natyrisht që do ketë kontrolle, do të vijë policia, tatimet, SPAK se mua më keqkuptojnë ndonjëherë me deklaratat, por kontrolle do të ketë nga institucionet, ashtu sikundër AMA kontrollon mediat”, tha Veliaj.
Sipas tij, zgjedhjet në FSHF duhet të bëhen përtej 25 majit, datë që do të luhet finalja e e Ligës së Konferencës.
“Të mbarojmë njëherë këtë event, pastaj le të bëhen edhe zgjedhjet”, tha Veliaj.
