Kur mori detyrën e ministrit të Brendshëm në vitin 2013, Saimir Tahiri “fshiu” me një të rënë të lapsit tv gjithë drejtuesit e policisë në qarqe, një pjesë të të cilëve i ndërpreu karrierën dhe disa të tjerë i ‘internoi’ duke i çuar në Akademinë e Policisë.
Një prej emrave që e pësoi me firmën e Tahirit ishte edhe Edmond Rizai, të cilin e largoi nga funksionet drejtuese dhe e çoi në Akademinë e Policisë, ku jepte mësim.
Dhe si për ironi, ishte Edmond Rizai, i cili mbrëmjen e së premtes, ekzekutoi vendimin e Apelit të GJKKO duke i vendosur prangat të dënuarit me 3.4 vite burg, ish-ministrit të Brendshëm, Saimir Tahiri.
Edmond Rizai drejton sot Drejtorinë e Hetimit në Policinë e Shtetit, drejtori e cila kreu mbrëmjen e së premtes arrestimin e ish-ministrit Tahiri, në sallën e gjyqit.
Kush është Edmond Rizai
Ish-shefi i OFL në Policinë e Shtetit, Edmond Rizai ishte kandidat potencial me Gledis Nanon për të marrë drejtimin e Policisë së Shtetit.
Ka mbajtur poste drejtuese për një kohë të gjatë që nga shef komisariati deri te zv/ drejtor dhe drejtor i hetimit të krimit.
Rizai qëndroi për disa kohë në akademi dhe u rikthye në Policinë e Shtetit si drejtues i drejtorisë hetimore në policisë e Shtetit, ish OFL, pas largimit të Artan Shkëmbit, kur erdhi ministër i Brendshëm Bledi Çuçi.
Rizai ka qenë gjithashtu një ndër hetuesit e dosjes së vrasjes së Azem Hajdarit.
