Dy huliganë grekë kanë rrëfyer për median helene ERT detaje tronditëse nga aktiviteti i tyre. 3 ditë pas vrasjes së tifozit të AEK, Alkis Kampanos nga një 23-vjeçar shqiptar, ata treguan se si veprojnë. Të maskuar para kamerës, ata lanë të nënkuptohej se dhuna është rruga e vetme e zgjidhjes së problemeve të ultrasve të futbollit. Njëri prej tyre tregoi se në rastet kur përballen me një grup të madh tifozësh kundërshtarë, ata lënë takim dhe përplasen fizikisht. Ndër të tjera, ai shtoi se sado i gabuar të jetë rregulli i konfrontimit të dhunshëm mes tifozëve të futbollit, përsëri mbetet rregull.
“Nëse është një person i vetëm, shkojmë së bashku 2-3 veta. Në raste të tjera, lëmë takime me mesazhe. Nëse dikush mban veshur fanelën e ekipit të tij, unë duhet t’ia heq. Ai nuk do të më lejojë mua dhe kështu funksionon rregulli. Edhe nëse është i gabuar, prapë është rregull”, tregoi huligani për ERT.
Huligani tjetër tha se qëllimi i grupit që përfaqëson është të tregojë se kush komandon në Selanik.
“Duam të tregojmë se kush komandon në qytetin e Selanikut. Flamuri jonë duhet të qëndrojë lart, edhe kur jemi në qeli”, bëri me dije ultrasi tjetër.
Si ndodhi ngjarja dhe arrestimi i 23-vjeçarit shqiptar?
Mëngjesin e ditës së martë, 10 ultras të “Bicepsit të Veriut” sulmuan Alkis Kampanos dhe dy miqtë e tij. Ata janë tifozë të klubit të njohur helen AEK. 23-vjeçari goditi barbarisht me thikë 19-vjeçarin Kampanos. Ngjarja e rëndë u fiksua nga kamerat rreth vendngjarjes. Arrestimi i vrasësit u bë i mundur nga identifikimi i targave të njërës prej automjeteve të huliganëve të “Bicepsit të Veriut”. Në momentin e arrestimit thuhet se ai u përgjigjur oficerëve të policisë se nuk e ka idenë përse është arrestuar. Mediat në Greqi e konsiderojnë shqiptarin e arrestuar një nga huliganët më të rrezikshëm në vend.
