Udhëtimi i Fjolla Morinës dhe Fisnik Sylës në Maldive ku i dhanë fund beqarisë me një ceremoni dasme shumë private është kryer me anë të mashtrimit.
Klan Kosova shkruan se ata i kanë paguar kompanisë së udhëtimit AS Travel, me çek të falsifikuar. Fisnik Syla i dërgoi kompanisë transaksion bankar, i cili rezultoi i falsifikuar. Më tej, thuhet se Syla i ka shkruar agjentit të kompanisë një mesazh duke iu betuar se do t’ua kthente borxhin.
Edhe pse kanë kaluar 9 muaj që nga ky udhëtim, në të cilin Fjolla dhe Fisniku u martuan, ende nuk është paguar tarifa.
Së fundmi, Fisniku ka reaguar për herë të parë duke treguar versionin e tij të ngjarjes. Ai e ka quajtur çdo gjë gënjeshtër dhe shantazh të hapur.
“Historia në fjalë është tërësisht e pavërtetë. Ky është një shtantazh i hapur. Mua më kanë marrë në telefon për të më kërkuar kinse sqarime pak orë para se emisioni në fjalë të fillonte, pa më lënë kohën të shpjegohesha. Dhe kanë shkelur ligjin duke incizuar bisedën time, pa më lajmëruar paraprakisht se biseda po incizohet. Mu për këtë arsye, unë kam angazhuar dy avokatë në Belgjikë dhe një në Kosovë që të merret me këtë çështje dhe do t’i padisë për shpifje personat në fjalë”, është shprehur ai në një intervistë për “Telegrafi”.
Më tej ai ka shtuar se e ka bërë pagesën në formë cash: “Unë e kam kryer pagesën prej 20 mijë eurosh në formën cash. Ia kam dhënë paratë në dorë, pasi nuk kam pasur kohë të merrem me çështje bankare, pasi më është dashur të vrapoj pas Fjollës, pasi e dijmë të gjithë çfarë problemesh ka pasur ajo në atë kohë [koha kur këngëtarja ishte shpallur në kërkim nga autoritet lidhur me arrestimin në kufirin Kosovë-Shqipëri]. Kështu për të më shantazhuar dhe kërkuar më tepër para, personi në fjalë [i referohet pronarit të agjencisë], ka gjetur mënyrën për të më kërkuar ‘borxhin’, i cili në fakt nuk ekziston”.
Për të vërtetuar fjalët e tij, ai ka nxjerrë për “Telegrafin” një video ku tregon të gjitha paratë në llogarinë e tij bankare, 500 mijë euro. Me këtë video Fisniku dëshmon se ka mjaftueshëm sa për të paguar borxhin, që sipas tij nuk ekziston.
