Nga Boldnews.al
Vetë kryeministri patentë nuk ka, por makina me shofer, truproja e shpurë biznesmenësh nga pas asnjëherë nuk i ka munguar. Ndonjëherë në pikën e karburantit as ka ndaluar të shohë, jo më të mbajë sytë teksa pompa e naftës që ti përpin ato pak të holla me çmimin 197 lekë për litër.
“Nuk varet nga qeveria çmimi i naftës. Edhe në vendet e tjera është rritur”-tha Rama, teksa mezi e kuptoi se për çfarë bëhej fjalë, jo më të merakosej për naftën, duke na “bërë naftën”.
Për një litër naftë që marrim mbi një mijë lekë të vjetra shkojnë për buxhetin e shtetit, si taksë e cila presupozohet se do na kthehet në të mira publike. Gjithashtu oligarkët e hidrokarbureve shpesh abuzojnë me çmimet, pavarësisht se ka një ligj që i detyron të ruajnë rezerva nafte dhe çmimet të mos rriten sipas bursës ndërkombëtare. Vetë shteti e ka në duar kontrollin e çmimit të naftës, qoftë edhe duke ulur tarifën e akcizës që merr, por kjo nuk ka ndodhur dhe nuk ka gjasa që të ndodhë.
Përderisa “protesta” e vetme mbetet reagimi në rrjetet sociale kjo është një lloj menuje e kapërdishme, madje fort eksituese për kreun e qeverisë i cili nuk sheh qoftë edhe një protestues të vetëm poshtë zyrës së tij, por vetëm “luguni” njerëzish që shprehin mllefin virtualisht. Qeveria nga mbyt praktikisht me taksa e tarifa, ndërsa shoqëria reagon virtualisht.
Rama duhet të rrijë fare i qetë. Sado të rrisë çmimet, sado të abuzojë me paranë publike protestë nuk do ketë. Edhe çmimi i bukës u rrit, taksat vendore gjithashtu, por “reagimi më i madh” është hakërrimi në shtëpi ndaj bashkëshortes që ankohet se nuk ka me çfarë të gatuajë.
Pushteti ka kapërcyer në një fazë tjetër, duke kryer eksperimente sociale që masin durimin e shoqërisë, e cila sa më shumë shtypet aq më pak ngre zë. Koncepti i Rilindjes është një sofistikim i një mendje të “të bukur djallëzore”, që me qytetarët bën eksperiment. Një drejtor i pushtetit që ka bërë karrierë të madhe e tha hapur se kishte kishte ndërprerë ujin për tre ditë, duke eksperimentuar sesa durojnë qytetarët, por sipas tij asnjë nuk reagoi dhe mungesa e ujit për një kohë të gjatë sipas tij nuk ishte problem.
Sot nafta po kap rekordet historike të çmimit, duke prekur të gjithë qytetarët pasi nëse ka rritje të çmimit të hidrokarbureve shtohen kostot e transportit që në fund bien si rëndim po mbi xhepat e çdo qytetari në vend. Edhe nëse braktisim automjetet pasi nuk përballojnë çmimin e naftës mund të vendoset edhe “taksë e re” për përdorimin e trotuarit. Megjithatë nuk duket një zgjidhje përfundimtare edhe kyçja e automjeteve duke i parkuar diku, sepse të vjen në xham gjoba e Policisë Bashkiake. Nuk mbetet gjë tjetër përveçse “trimërimi” në rrjetet sociale që nëse mbetet vetëm aty, ia bëjnë ditën 1000 drejtuesve të pushtetit.
