Policia Rrugore e Tiranës ka ndëshkuar me gjobë një drejtues mjeti, i cili bënte gara shpejtësie, duke xhiruar gomat e makinës dhe më pas videot i postonte në rrjetet sociale.
Në njoftimin e Policisë nuk bëhet i ditur identiteti i drejtuesit, as inicialet dhe mosha, por theksohet se ai është ndëshkuar me gjobë 50.000 lekë.
NJOFTIMI ZYRTAR
Më datë 31.01.2022, rreth orës 22:00 në rrjete sociale janë hedhur pamjet filmike ku një mjet tip “BMW”, nuk ka rregulluar shpejtësinë duke bërë xhirime gomash dhe drift.
Shërbimet e Policisë Rrugore të Tiranës, menjëherë organizuan punën për identifikimin dhe kapjen e autorit të dyshuar. Pas një pune intensive hetimore profesionale u bë i mundur identifikimi i targës së automjetit dhe më pas i drejtuesit të mjetit, i cili u ndëshkua me masë administrative 50.000 lekë.
Komisariati Rajonal i Policisë Rrugore është i hapur për qytetarët për denoncimin e kundërvajtjeve rrugore me qëllimi ndëshkimin e drejtuesve të mjeteve, për krijimin e një mjedisi sa më të sigurt për përdoruesit e rrugës dhe për të rritur besueshmërinë tek qytetarët.
