Lulzim Basha ka zhvilluar një takim me demokratët e degës nr 14 në Tiranë, ku tha se rotacioni është i shëndetshëm për demokracinë, sikundër është ndërrimi i gjakut për trupin.
Basha akuzoi Ramën për masakrën elektorale të 25 prillit, duke theksuar se edhe vetë ODIHR tha se prioritet për shtetin shqiptar është që të garantojë votën e lirë.
Ai gjithashtu foli për mos ndëshkimin e krimeve elektorale të dosjes së Durrësit dhe Dibrës, ndërsa tha se janë pikërisht krimet elektorale që e bëjnë Qeverinë që të mos japë llogari.
“Nuk i japin përgjigje pyetjeve sepse janë karburantet më të shtrenjta në Shqipëri se në Europë, apo pse nuk jepen subvencione për fermerët shqiptarë? Kush e ka fajin qytetarët? Si ka mundësi që ai thotë se punë ka, por s´ka specialistë? Si ka mundësi që shqiptarët kur shkojnë jashtë dalin më të mirë si në punë ashtu edhe në studime?”, u shpreh Basha.
Sipas tij, e gjithë kjo tymnajë ka lidhje me mbulimin e të pambulueshmes: Shqipëria është vend i vjedhur, dhe ju vidheni sepse vidhen zgjedhjet.
Basha tha se politika e vjetër kërkon sundim të përjetshëm. “Bënë marrëveshjen në 2008 për të sunduar bashkarisht, për të kapur institucionet”, tha Basha, referuar ndryshimeve kushtetuese të realizuara 14 vite më parë, të cilat në atë kohë u votuan edhe nga vetë Basha, që mbante post ministror në kabinetin Berisha.
Sipas tij, më 30 qershor 2019 nuk pati një proces normal votimi. “Shikoni si kanë dalë sot hapur fare politika e vjetër bashkarisht. Berishën, Ramën dhe Metën i lidh bashkë se shqiptarët e kanë kuptuar instrumentin e politikës së tyre të vjetër, premto mos mbaj premtime, pastaj premto prapë dhe sërisht mos bëj gjë”, tha Basha.
Ai tha se Berisha me veprimin e tij të koalicionit “Shtëpia e Lirisë” tregoi se donte të dorëzonte PD te Ilir Meta dhe shtëpinë e lirisë ta kthente në shtëpinë e Ilirit.
“Këto ditë, e sotmja, e gjithë beteja, edhe sulmi, denigrimi që u është bërë demokratëve të ndershëm, si shumë prej jush në këtë sallë, drejtuesve, të gjithëve. S’po flas ndaj meje si kryetar i partisë, se vet zgjodha t’i vija gjoksin kësaj, pikërisht që mos të futej përçarja përmes demokratëve apo deputetëve, zonjave, anëtarëve të kryesisë. E gjitha kjo për çfarë paska qenë?
Për t’i dorëzuar PD-në LSI-së dhe Ilir Metës?! Gjithë ajo skenë barbare atje e sulmit kundër shtëpisë së demokratëve, për çfarë paska qenë? Që shtëpia e lirisë të kthehet në shtëpinë e Ilirit?!
Se kështu i bie! Apo jo?!
Të sfiduar kemi qenë dhe jemi, por në ato sfida vetëm sa jemi forcuar e jo dobësuar vendosmërinë tonë, për ti shkuar deri në fund betejës. Po e them në numrin shumës, por kështu ndihem unë. Nuk e di, a e shpreh apo jo dhe mënyrën se si ndiheni dhe ju. Kjo betejë nuk na përkul!
Asnjë hap pas nuk hedhim! Nuk mund te themi;” zgjedhim të ardhmen”, e të sprapsemi! Jo! Ditë për ditë nga një hap përpara! Ditë për ditë me më shumë shqiptare e shqiptare ne krahun tonë! Çfarë duan shqiptarët?! Duan ndryshim! Çfarë është ndryshimi?! Nuk është ndryshim karrigesh! Nuk është ndryshim fytyrash! Dua një ndryshim, i cili, njësoj si para 32 vjetësh, është një ndryshim i thellë, jo vetëm politik, por kulturor. Nuk duan më kultin e individit! Zoti na bën të gjithë të barabartë.
Të gjithë jemi të barabartë përpara Zotit. Sigurisht na jep mundësi e fakultete të ndryshme, dhe pastaj secili, në jetën tonë, në përgjegjësinë e vet, i zhvillon ato, por duhet të ketë mundësi ti zhvillojë. Nuk ka Zot mes nesh. Askush nuk mund ti vihet tjetrit, dinjitetit të tjetrit. Askush nuk mund të gllabërojë pronën, nderin, mundësinë, dinjitetin. E që të jemi të tillë, duhet në radhë të parë që, ajo, instrumenti i shërbimit ndaj njerëzve në tokë, që është politika, ta ketë këtë fytyrë njerëzore, ta ketë këtë tipar njerëzor, që e ka humbur”, tha Basha.
