SPAK po heton kreun e Fondit Shqiptar të Zhvillimit, Dritan Agolli, lidhur me tenderin e shpallur nga institucioni që ai drejton me vlerë 400 mijë dollarë, ku fitues ishte kuzhinieri i njohur Alfio Rrotani, pronar i një restoranti përballë FSHZH dhe shef kuzhine në lokalin e djalit të Agollit në Hamallaj.
Sipas raportimeve mediatike, pasi SPAK ende nuk ka dalë me një njoftim zyrtar, mësohet se Agolli po hetohet për shpvrdorim detyre, abuzim me fondet publike dhe korrupsion.
Por në një reagim Dritan Agolli i ka mohuar akuzat duke deklaruar se janë shpifje.
“Në mënyrë të vazhdueshme prej politikes së vjetër dhe përfaqësuese të kulturës së baltës sulmohen institucionet dhe drejtuesit për punën dhe rezultatet e tyre. Në këto sulme nuk lihet mënjanë edhe FSHZH, që është një prej organizatave më të suksesshme në gjithë këto vite, ne funksion të zhvillimit rajonal dhe vendor dhe së fundmi dhe ne procesin e Rindërtimit.
Lidhur me çështjen e konfliktit të interesit tashmë që kam ardhur në dijeni nga mediat që kanë filluar hetimet për këtë çështje nga organet kompetente sqaroj se në këtë pikë tashmë janë këto organe që do të shqyrtojnë dhe vlerësojnë këtë çështje dhe nuk ka më vend për sqarime mediatike.
Në përfundim i shoh në sy me kurajo të gjithë ata që shpifën dhe që i përcollën ato dhe ju them se shpifjet e tyre vetëm më shtojnë bindjen dhe më japin forcë për të ecur përpara në rrugën për zhvillimin e vendit tonë”, thuhet ndër të tjera në reagimin e Agollit.
