Tre persona humbën jetën dhe dy të tjerë u plagosën në aksidentin e ndodhur këtë të Martë në aksin Elbasan-Librazhd, në vendin e quajtur “kthesa e Murrashit”.
Policia njoftoi se rreth orës 09:10, “automjeti tip ‘Ford’, me drejtues shtetasin S.GJ., 32 vjeç, banues në fshatin Floq, Librazhd, është përplasur me mjetin tip “Benz”, i cili ka dalë nga rruga dhe ka rënë në lumin Shkumbin”.
Si pasojë e aksidentit janë plagosur rëndë: Ambra Halili, rreth 20 vjeçe dhe E.K., rreth 10 vjeç, të cilat janë transportuar në spital, për ndihmë mjekësore.
Pas ndërhyrjes së zjarrfikësve dhe të punonjësve të Policisë, në kushte të vështira për shkak të reshjeve të shiut, pas disa orësh, u bë e mundur që të nxirren pa jetë nga mjeti që kishte rënë në mes të lumit: Elmi Keqa, 52 vjeç, bashkëshortja Elona Keqa, 34 vjeçe dhe Elis Sulmataj, 18 vjeç.
Viktimat dhe të plagosurit udhëtonin me automjetin “Benz ML” që ra në humnerë dhe përfundoi i përmbysur në lumin Shkumbin.
“Grupi hetimor, nën drejtimin e Prokurorisë, po punon për dokumentimin e plotë të ngjarjes dhe përcaktimin e shkakut të aksidentit”, thuhet në njoftimin e policisë.
Dyshimet janë se drejtuesi i mjetit tip “Ford” që lëvizte me drejtim Elbasanin devijoi nga korsia për të shmangur gurët që kishin rënë në rrugë nga mali dhe më pas ndodhi përplasja me mjetin tip “Benz” që lëvizte me drejtim Librazhdin. Më pas, mjeti tip “Benz” doli nga rruga dhe përfundoi në lumin Shkumbin.
Një prej dëshmitarëve, tha po ashtu se barriera anësore në atë pjesë të rrugës është prishur prej rreth 2 muajsh.
