Tre persona janë nxjerrë nga automjeti që përfundoi në lumin Shkumbin këtë të Martë, pasi doli nga rruga në vendin e quajtur “kthesa e Murrashit”, në aksin Elbasan-Librazhd.
Një prej personave të nxjerrë nga mjeti është fëmijë, ndërsa raportohet se të gjithë janë dërguar me autoambulancë në spital.
Ndërkohë, ekipet zjarrfikëse po punojnë për nxjerrjen edhe të dy personave të tjerë që kanë ngecur në makinën që pas daljes nga rruga, ka përfunduar e përmbysur në lumë. Nuk dihet ende gjendja shëndetësore e tyre.
Aksidenti ndodhi rreth orës 09:10.
“Në aksin rrugor Elbasan-Librazhd, vendi ‘Kthesa e Murrashit’, ka dalë një mjet nga rruga dhe për pasojë ka rënë në Lumin Shkumbin. Në vendngjarje ndodhen shërbimet e policisë Elbasan dhe shërbimet e zjarrfikëseve dhe po punohet për nxjerrjen e drejtuesit të mjetit dhe të pasagjerëve. Grupi hetimor po punon për zbardhjen e rrethanave të aksidentit”, njoftoi policia.
