Ekzekutimi nga bandat e një shqiptari që thuhet se po maskohej si shtetas britanik, ka hedhur dritë mbi gjendjen e vështirë me të cilën përballet Antwerp në betejën kundër bandave të drogës që kontrabandojnë kokainë në Evropë.
Bledar Muça, 39 vjeç, i cili posedonte letra britanike, ishte një bashkëpunëtor i ngushtë i mafiozëve të lartë shqiptarë, u qëllua jashtë banesës së tij në periferi të kryeqytetit de facto të Flanders, qendrës së re të luftës së Evropës kundër drogës ilegale.
Fotot tronditëse të publikuara në mediat lokale treguan një vrasës me pagesë, i cili i zuri pritë në rrugën jashtë shtëpisë së viktimës së tij, duke i gjuajtur me një pistoletë përpara sulmit, për të cilin autoritetet lokale thanë se kishte të gjitha shenjat e një vrasjeje me porosi.
Muça, i cili mendohet se ka jetuar në Londër nga viti 2016 deri në vitin 2020, thuhet se ishte krahu i djathtë i Florenc dhe Adrian Capja, dy emra të shquar të botës së krimit të Shqipërisë, dhe si rezultat kishte dokumente të paligjshme identiteti britanike, si dhe dokumente bullgare.
Por vrasja e shtetasit shqiptarit 39-vjeçar, e fundit në një tendencë në rritje të krimeve të dhunshme të lidhura me drogën në Antwerp, ishte me pak interes për politikanët vendas dhe oficerët e zbatimit të ligjit, të cilët po përballen me një çështje shumë më të madhe kur vjen puna në betejën kundër mbretërve të kokainës që veprojnë jashtë portit të transportit të qytetit.
Zyrtarët e doganave, të cilët janë në vijën e parë të luftës së Evropës kundër trafikut të drogës, janë në shënjestër të kriminelëve, duke përdorur zhvatje, ryshfet dhe kërcënime për dhunë, ndërsa politikanët “fërkojnë supet” me bosët e lartë të drogës.
Bart De wever, kryebashkiaku i Antwerp-it, pranoi se miliarda euro të ardhura nga droga janë infiltruar në politikën lokale, biznese legjitime dhe jetën e përditshme në qytetin që ai ka qeverisur për gati një dekadë.
Zyrtarët në portin e Antwerp-it bënë konfiskim rekord vitin e kaluar të pothuajse 90 tonë kokainë, me vlerë rreth 13 miliardë euro, por pavarësisht nga kjo ngarkesë, miliarda euro ende përdoren për të “helmuar” nivelet më të larta të shoqërisë me drogë.
“Para se ta kuptoni, ju jeni ulur pranë një krimineli droge në një pritje apo në një festival të madh sportiv” – tha De wever për The Telegraph.
Ai shtoi se kriminelët kishin lëvizur nga frontet tradicionale të përdorura për të pastruar paratë tashmë.
Pa asnjë mënyrë për të bërë dallimin midis këtyre krerëve kriminale dhe sipërmarrësve legjitimë, “biznesmenët e ndershëm” janë të ndikuar nga fluksi i parave të kokainës, tha kryebashkiaku i Antwerp.
Një burim tha se pronat e paluajtshme të qytetit po bliheshin në sasi të mëdha si pjesë e skemave të mëdha të pastrimit të parave.
Në dekadën e fundit, konfiskimet vjetore janë rritur nga pesë tonë në pothuajse 90 tonë të vitit të kaluar, pasi epiqendra e importeve të drogës u zhvendos nga Spanja në Evropën Veriore.
Por zyrtarët në terren besojnë se ata po kapin vetëm 10 për qind të asaj që përfundimisht dal në rrugë.
Si rezultat i lidhjeve historike tregtare me Panamanë, Ekuadorin dhe Paraguajin, Antwerp është shfaqur si porta për vërshimin e kokainës në kontinent.
Fluksi i drogës nuk tregon shenja ngadalësimi, me zyrtarët belgë të doganave që pranojnë se po bëjnë një betejë të humbur, pasi fuqia shpenzuese e trafikantëve të pasur të kokainës tejkalon masivisht buxhetet e zyrtarëve lokalë.
Kristian Vanderwaeren, drejtori i përgjithshëm i departamentit të doganave dhe akcizave të Belgjikës, pranon se puna e ekipit të tij ka pothuajse ndikim “zero” në fitimet e mëdha që grumbullohen nga rrjeti kriminal.
