Ish-Kryeministri Sali Berisha u shpreh sot, në emër të Komisionit të Rithemelimit, se me datën 6 mars do të bëjmë ç´është e mundur që kandidatët tanë të jenë qytetarët e parë në Bashkitë ku votojnë.
Berisha shprehu falenderime për të gjithë kandidatët e përfshirë në garë, ndërsa u shpreh se anëtarësia e PD votoi masivisht në primaret e para të organizuara, duke i dhënë forcë anëtarësisë në vendimmarrje.
Bardh Spahia, kandidati për Bashkinë e Shkodrës, e cilësoi garën e djeshme në kuadrin e primareve si të jashtëzakonshme dhe me shumë vlerë në aspektin e votës së lirë.
“Kjo mënyrë e përzgjedhjes së kandidaturave ka qenë e shumëpritur jo vetëm nga anëtarësia e PD, por nga qytetarët shqiptarë në tërësi, pasi i jep vlerë votës së lirë të qytetarëve, për të zgjedhur emrat që vetë qytetarët duan ti përfaqësojnë. Vendimmarrja u kthye te qytetarët, te demokracia direkte”, tha Spahia.
Ardian Muka, kandidat për Bashkinë e Durrësit, duke marrë fjalën, ka përgëzuar demokratët e qytetit bregdetar, që me votën e tyre, shprehën vlerat më të mira qytetare dhe demokratike.
“Sfida jonë në Durrës është pak e veçantë, pasi prej 22 vitesh kjo bashki drejtohet nga e majta. PD, me mbështetjen edhe të forcave të koalicionit, do e kthjmë qytetin te qytetarët”, tha Muka.
