La Liga ka injoruar flamurin e Kosovës! Transferimi i Vedat Muriqit nga Lacio te skuadra e Majorkës, është prezantuar me flamurin e Shqipërisë. Edhe pse sulmuesi është pjesë e përfaqësueses “dardane”, në krah të tij është vendosur flamuri kuqezi, kjo për shkak se Spanja nuk e njeh Kosovën si shtet.
Muriqi do të jetë si i huazuar te Majorka deri në fund të sezonit, ndërsa ekipi spanjoll do ta ketë të drejtën e blerjes së shqiptarit të Kosovës.
Në një hulumtim në faqen zyrtare të La Ligës, ku pasqyrohen të gjitha lëvizjet në merkato, në krah të emrit të Vedat Muriqit është vendosur flamuri shqiptar.
Kjo nuk është hera e parë, që në Spanjë krijohen të tilla situate. Kujtojmë që kur Kosova u ndesh me Spanjën, ndodhën shumë incidente të shëmtuara në lidhje me flamurin e Kosovës.
Dardanët ishin në grup me Spanjën në kuadër të kualifikueseve për Botëror. Në dy ndeshjet që u zhvilluan, Spanja vazhdimisht e injoronte Kosovën duke e shmangur emrin dhe simbolet. Madje, në ndeshjen e parë, Spanja iu referua Kosovës si “territori i Kosovës”.
