Ish-Kryeministri Sali Berisha e ka cilësuar si të shkëlqyer Foltoren e Vaut të Dejës, ndërsa u prit me entuziazëm dhe me thirrjet “O Sali o hero, gjithë Shqipëria ty të do”.
Berisha tha se demokratët e kësaj treve qëndruan gjithmonë në mbështetje të vlerave të PD-së.
“Sot në 6 bashki të Shqipërisë, anëtarët dhe anëtaret e PD votojnë dhe zgjedhin me votën e tyre të lirë, kandidatin ose kandidaten që do të garojë për qytetar të parë në këto bashki. 4 muaj më parë ne premtuam këtë praktikë, ne rikthyem votën e lirë.
Primaret janë metoda më demokratike e zgjedhjes së përfaqësuesve tuaj. Ju me votën tuaj do të zgjidhni jo vetëm kandidatët për kryebashkiak, por edhe këshilltarët, kandidatët për deputet, madje edhe deputetët tuaj. Merr fund praktika korruptive dhe autoritare e përcaktimit të kandidatëve, e emërimeve nga lart, e zarfeve dhe pakove me euro për të fituar emërimin”, tha Berisha.
Ish-Kryeministri tha se pa votën e lirë nuk ka liri të vërtetë. “Partia Socialiste nga viti 2009 dhe deri më sot nuk ka bërë asnjë votim të lirë. Partia Demokratike e drejtuar nga Lulzim Brava degradoi në atë shkallë që tejkalon edhe imagjinatën e Garcia Markez, George Orwell apo Franc Kafka-s. Degradoi në atë shkallë sa atje ku ishin 1908 karrige ishin ulur 5004 delegatë. Duke vendosur primaret, PD i jep fund kësaj situate korruptive dhe totalitare”, tha Berisha, duke shtuar se vota e lirë u rikthehet anëtarëve.
Berisha tha se ne sot rikthyem dhe bëmë realitet vendosjen e dinjitetit të anëtarëve dhe anëtareve të PD.
