Rafael Nadal arriti të fitonte finalen e Australian Open, duke marrë kështu trofeun e 21-të në karrierë në një turne Grand Slam, një rekord botëror në tenisin për meshkuj. Spanjolli la pas rivalët “e përjetshëm” të tij, Novak Djokovic dhe Roger Federer, të cilët kanë fituar në karrierë 20 trofe Grand Slam.
Kjo ishte hera e dytë që Nadal fitonte këtë turne, për herë të parë e kishte fituar në vitin 2009.
35-vjeçari mundi në 3-2 me sete rusin Daniil Medvedev (2-6, 6-7, 6-4, 6-4, 7-5), duke përmbysur rezultatin pasi humbi dy setet e parë. Edhe pse 10 vite më i ri se spanjolli, Medvedev u detyrua të dorëzohej pas 5 orësh e 24 minutash.
Turneu u shënua nga mungesa e Djokovic, pasi tenistit serb iu mohua hyrja në Australi për shkak se nuk kishte marrë vaksinën kundër koronavirusit. Ndërsa Roger Federer mungoi për shkak të një dëmtimi. Edhe Nadal ishte në dyshim për këtë turne, për shkak se kishte qëndruar jashtë fushave të tenisit përgjatë gjysmës së dytë të vitit 2021, për një dëmtim në këmbë. Por me fitoren e kësaj finaleje epike, spanjolli tregoi se është ende në majat e këtij sporti.
