Tre persona janë arrestuar dhe një i katër është proceduar në gjendje të lirë në dy aksione të ndryshme të policisë së Lezhës, që ka sekuestruar rreth 50 kg drogë.
Munella
“Në operacionin policor të koduar ‘Munella’, në fshatin Domgjon, Fanë, Mirditë, shërbimet e Policisë gjatë kontrollit të ushtruara në banesat e shtetasve V.Ll. dhe P.N., kanë gjetur dhe sekuestruar në cilësinë e provës materiale 31 kilogramë e 600 gramë lëndë narkotike e dyshuar cannabis sativa. Në përfundim të veprimeve, specialistët për Hetimin e Narkotikëve dhe Trafiqeve në DVP Lezhë, bënë arrestimin në flagrancë të shtetasve: V.Ll., 49 vjeç, lindur në Domgjon, Mirditë, banues në Zejmen, Lezhë dhe P.N. 43 vjeç, lindur në fshatin Xhuxhë, Mirditë, banues në Tale, Lezhë, për veprën penale ‘Prodhimi dhe shitja e narkotikëve, kryer në bashkëpunim’, njoftoi policia.
Kaçinari
“Në kuadër të operacionit policor të koduar ‘Kaçinari’, në fshatin Arrëz, Kaçinar, shërbimet e Policisë kanë ushtruar kontroll në banesën e shtetasit B.Ç. dhe kanë gjetur dhe sekuestruar në cilësinë e provës materiale 18 kilogramë lëndë narkotike të dyshuar cannabis sativa. Specialistët për Hetimin e Narkotikëve në DVP Lezhë, bënë arrestimin në flagrancë të shtetasit: B.Ç.,36 vjeç, banues në fshatin Arrëz ,Mirditë, për vepren penale ‘Prodhimi dhe shitja e narkotikëve’, si dhe proceduan penalisht në gjëndje të lirë për shkak të problemeve shëndetësore, babain e tij shtetasin P.Ç.”, shtuan të njëjtat burime.
Operacionet, sipas bluve, u zhvilluan në kushte të vështira të motit dhe në terren të thyer malor.
