Nga Boldnews.al
Çdo herë që ndodh një “krim pushteti” vështirë që të mos shfaqet kryebashkiaku i Tiranës Erion Veliaj. Shembja e Teatrit Kombëtar ishte një ëndërr e kahershme e Ramës që u bë realitet me duart e kanakarit të tij, Erion Veliaj. Në vitin 1999, kur halli i madh ishte lufta në Kosovë dhe qindra mijëra të shpërngulur që kërkonin strehë në tokën mëmë, Edi Rama si Ministër Kulture i kohës thurte “beteja” kundër arkitekturës kulturore dhe ajo që i zinte sytë më shumë ishte godina e Teatrit Kombëtar.
Nuk ia arriti qëllimit ta shembte për shumë arsye pasi nevojitej firma e një kryeministri dhe kamikazllëku i një kryebashkiaku që qëllimi të bëhej vepër e realizuar. Koha erdhi pikërisht më 17 maj 2020, kur me urdhër të Ramës dhe me vendosmërinë e Veliajt u gatua një mbledhje e paligjshme e Këshillit Bashkiak të Tiranës dhe në fund Lali Eri Veliaj urdhëroi fadromat të rrënonin godinën e Teatrit Kombëtar.
Ky ishte krimi i radhës me dëshirën e tij që plotësonte dëshirën e Ramës. Po nuk është e vetmja “punë e pisët” që vjen nga haluçinacionet kryeministrore dhe përfundon për ekzekutim nga duart e Veliajt. Në prishjen e bnesave të Unazës së Re u fot si hijë përçarëse edhe kreu i bashkisë së kryeqytetit. Ndonëse loja e madhe ishte një aferë e frikshme korruptive, Veliaj nuk kishte si të mos tregonte zellin. I quajti protestuesit “shpellarë”, ndërsa shfaqte video propagandistike me “Ukën nga Tropoja” që e prishte vetë banesën dhe “hapte rrugë zhvillimit të Tiranës”. Edhe aty ra fadroma e pushtetit dhe Lali ndodhej në vendin kur banesat u kthyen në gërmadha.
Fadroma është mjeti që Rama dhe Veliaj kanë ardhur në pushtet dhe po mbajnë pushtet. Prej fadromës vjen shkatërrimi i shtëpizave dhe objekteve kulturore dhe prej betonit është fryma që lartëson kulla e mban me ushim oligarkinë dhe qeverinë, qëndrore dhe lokale.
Fati i zi i radhës ishte për mbi 150 banesa në lagjen “5 Maji” në Tiranë. Shtëpitë u shembën në mesin e dimrit, duke lënë në dorën e Zotit dhe të motit mbi 600 banorë. Pallate, resorte dhe komplekse tregtare do të ndërtohen në emër të “zhvillimit” dhe “strehimit”. Veliaj është aty gjithnjë, duke lënë pas shkatërrim dhe vuajtje njerëzore. Dhjetara punonjës të policisë Bashkiake, fadroma të bashkisë dhe policisë së shtetit në pak orë rrafshuan qindra banesa, duke përdhosur edhe qytetarët që më kot klithnin për strehën që ia rrënoi pushteti.
Konstumi i një kryelokalisti po i rri ngushtë Veliajt. Kapërcen përtej bashkisë, duke hapur luftën me kreun e FSHF-së Armand Duka. “Nuk pyes për FIFA, UEFA, Jezus, apo Muhamed, ne nuk jemi kurva, i kam bolet prej hekuri”-shprehu talentin e tij prej laci dhe kërcënuesi Erion Veliaj ndaj njerëzve të futbollit. Në luftën ndaj Dukës, Lali Eri nuk është i vetëm, ka pas edhe sistemin e drejtësisë, Tatim-Taksat dhe çdo institucion tjetër “të pavarur” në letra.
Në konfliktin me Dukën, duke se i është vetëofruar Ramës, për të treguar në këtë rast jo vetëm zellin si “i bindur” ndaj tij, por për të vënë në pah forcën, aq sa mund të arrijë të mposhtë një të “pamposhtur” në drejtimin e FSHF-së.
Në çdo punë të pisët, ku ka shantazh, afera dhe tragjedia njerëzore, është i kudogjendur edhe Veliaj, që njëkohësisht po tregon se ka pushtet ekonomik dhe politik, duke krijuar oazin e tij të oligarkisë, por edhe njohjet e duhura në sistemin e drejtësisë që denocimet ndaj Veliajt i kanë kthyer në “letra pa vlerë” që mbushin arkivën.
