Në një deklaratë për mediat, Presidenti Ilir Meta shprehu shqetësimin për rritjen e borxhit publik. Kreu i shtetit u shpreh se qeveria duhet të marrë masa të menjëhershme, pasi në të kundërt vendi rrezikon një krizë serioze.
“Qëllimi kryesor i këtij komunikimi ka të bëjë me shqetësimet e vazhdueshme, gjatë këtyre viteve, lidhur me përkeqësimin e situatës me borxhin dhe mungesën e transparencës. Niveli i borxhit në vitet në vazhdim mund të shkaktojë një krizë serioze. Të merren masa të menjëhershme parandaluese për uljen e tij. Vlera reale e borxhit në fund të vitit mund të arrijë në nivelin 84% të prodhimit të brendshëm bruto”, tha Meta.
“Duhet të gjithë të marrin seriozisht çështjen e listës me borxhin, mos të bëjnë sikur s’shikojnë edhe faktorë që janë në opozitë. Është vërtet në interes të një grupi të caktuar që ka kapur shtetin për të kapur shtetin edhe në interes të një grupi oligarkësh që përfitojnë shumë nga kjo situatë, por është një dramë për familjet shqiptare”, u shpreh kreu i shtetit.
