Deputetja Grida Duma nga foltorja e Kuvendit, ka reaguar lidhur me deklaratat e ish-kryeministrit Sali Berisha, i cili hodhi akuza të forta ndaj Lulzim Bashës dhe Edi Ramës lidhur me çështjen e inceneratorëve, por edhe pastrimin e parave.
Duma iu drejtua socialistëve duke thënë se kur Berisha fliste, ata shkëlqenin pasi shohin sesi mundin veten.
“Jemi përballë njëri-tjetrit duke mashtruar secili më shumë. Dalin ministra dhe thonë këtu ju kemi mundur tre herë. Në fakt ne nuk jemi mundur nga ju. Ju keni mundur një gjë, të drejtën e shqiptarëve për mirëqënie, shpresë. Që s’thuhen të vërteta më, ju e konsideroni mafiozllik politik. Unë do ta filloj nga të vërtetat tona. Jemi mundur, por jo nga ju, jemi mundur nga vetja. Çohet këtu më i vjetri ndër nesh dhe jemi përpjekur ta nderojmë dhe thuhet gjithçka është e mundur për ta bërë ta pamundur opozitarizmin. Ai fliste, ju shkëlqenit sepse shikonit sesi ne mundim vetveten. Një gjë është e sigurt, të thuash të vërtetëtn është forcë, të fshihesh pas të vërtetave të tjetrit është dobësi. Në kaq mandate ju nuk thoni dot një të vërtetë”, tha ajo.
