Totenhemi po mendon që të bëjë një ofertë për futbollistin e Milanit Franck Kessie në Janar, që të shmangë një garë të fortë me klubet e tjera në verë.
Mesfushori 25-vjeçar pas pesë muajsh ka mundësinë të largohet nga kuqezinjtë si një futbollist i lirë. Për shërbimin e lojtarit nga Bregu i Fildishtë, janë të interesuara edhe disa klube të tjera dhe drejtuesit e “Spurs” e dinë se në verë do të jetë shumë më e vështirë që ta bindin lojtarin.
Kessie u bë pjesë e “Djallit” në vitin 2017, kur u transferua nga Atalanta dhe ka luatjur në 200 takime. Edhe PSG-ja ka shfaqur interes për lojtarin dhe Totenhemi kërkon t’i paraprijë konkurentëve.
Trajneri Antonio Conte u ka kërkuar drejtuesve të klubit që të forcojnë edhe më shumë ekipin, në mënyrë që të rriten shanset që Totenhemi të dalë ndër katër skuadrat më të mira të Premier Ligës.
“Spurs” janë 1 pikë larg vendit të katërt, ndërsa kanë tri takime më pak se sa rivalet.
Drejtuesit janë gati që të ofrojnë para për kartonin e futbollistit të Milanit, e gjithashtu një rrogë që do ta joshë mesfushorin, e do ta bëjë që të harrojë interesimin e klubeve të tjera.
