Ish-kryeministri Sali Berisha publikoi një video në rrjetet sociale ku bëhet krahasimi mes asaj që thoshte para pak vitesh Agron Gjekmarkaj për Lulzim Bashën me atë që thotë tani.
“Dëgjojeni dhe vlerësojeni vetë!” shkruan Berisha.
Në vitin 2017, Gjekmarkaj, në ‘kostumin e analistit’, ai lëshonte akuza ndaj Bashës. “PD nuk ka qenë kurrë kështu. Pas kësaj katastrofe, Basha ka vetëm një synim, karrierën dhe karrigen e tij. Unë mendoj se nëse Basha vazhdon duke u kapur pas karriges dhe të bëjë çmos për ta ruajtur atë, do ta parcelizojë, do e ndajë dhe në fund do ta katandisë PD-në në një parti të vogël, banale dhe familjare”, shprehej ai.
Por në një takim në Laç dje, ai deklaroi se Lulzim Basha është një burrë që nuk i dridhet qerpiku, që nuk ka frikë dhe është i gatshëm të përballet me rrezikun. “Është i gatshëm në vetë të parë ti dalë për zot PD-së. Është i gatshëm të përballet me Edi Ramën. Është i gatshëm të jetë nesër kryeministër i Shqipërisë”, tha deputeti.
