Një shqiptar, i kërkuar nën dyshimin për vrasje është ekstraduar nga Shqipëria në Britaninë e Madhe dhe do të dalë para gjykatësve në Cardiff..
Mediat britanike bëjnë me dije se i ekstraduari është Gledis Mehalla, 20 vjeç, i cili akuzohet, së bashku me shtatë të tjerë, për vrasjen e polakit Tomasz Waga , 23 vjeç, ngjarje e ndodhur në Cardiff më 28 janar 2021.
Mehalla është personi i nëntë që përballet me gjyq në lidhje me këtë çështje.
Trupi i Tomasz Waga u gjet në Westville Road, Penylan. Policia e Uellsit të Jugut lëshoi një kërkesë arresti për Mehalla nën dyshimin për vrasje dhe lëndim të rëndë trupor dhe u arrestua nga autoritetet shqiptare më 2 tetor 2021.
Home Office lëshoi një kërkesë ekstradimi, e cila u urdhërua nga një gjykatë shqiptare në nëntor 2021.
Ai u ekstradua më 20 janar dhe ka dalë para Gjykatës së Magjistraturës së Cardiffit të premten, më 21 janar, ku u njoh me akuzën dhe masën e sigurisë.
Të gjithë të akuzuarit do të dalin në gjyq më 28 shkurt 2022 në Newport Crown Court.
Dy të dyshuar të tjerë janë ende në kërkim në lidhje me vdekjen e Waga-s. Ata janë Artan Pelluci, 29 vjeç, gjithashtu nga Cathays, dhe Elidon Elezi, 22 vjeç, nga East Finchley, Londër.
