Kryeministri Edi Rama, njëherazi edhe kreu i PS-së, ka mbledhur Kryesinë e kësaj partie, lidhur me zgjedhjet e pjesshme që do të mbahen në 6 mars në 6 bashki.
Pas dekretit të Presidentit që zyrtarizoi mbajtjen e zgjedhjeve për Kryebashkiakë në Shkodër, Vorë, Durrës, Lushnje, Rrogozhinë dhe Dibër, Kryeministri ka mbledhur sot rreth orës 13:30 Kryesinë e Partisë Socialiste.
Nga raportimet mësohet se në mbledhje do të përcaktohen grupet e punës në të 6 bashkitë, ku pritet të angazhohen të gjithë anëtarët e Kryesisë, por edhe deputetët, si dhe anëtarët e Këshillit të Ministrave.
Gjithashtu, pritet që nga drejtuesit e qarqeve, të merren propozimet lidhur me kandidatët e mundshëm për të 6 njësitë e qeverisjes vendore, dy prej të cilave, Shkodra dhe Durrësi, janë bashki të një rëndësie të veçantë. Nuk dihet nëse socialistët do të pranojnë ose jo që në zgjedhjet për Bashkinë e Shkodrës të jenë në aleancë me PSD e drejtuar nga Tom Doshi, ndaj të cilit në jo pak raste janë hedhur akuza nga socialistët shkodranë se ka marrë nën kontroll pothuajse të gjitha institucionet, lidhur me emërimet e bëra.
Ndërkohë për Vorën, e cila përfshihet në qarkun e Tiranës, pritet që fushata të drejtohet nga Erion Veliaj, Elisa Spiropali dhe Belinda Balluku. Interesant do të jetë se cili prej tyre do të shfaqet si protagonist apo si drejtuesi i fushatës për Vorën.
Ndërkohë në Durrës nuk përjashtohet mundësia e angazhimit të Vangjush Dakos, i cili edhe më 25 prill pati një angazhim mjaft aktiv në qarkun ku kandidonte edhe Edi Rama, që renditej i 8-ti në listën shumëemërore, ndërkohë që Lefter Koka, i konsideruar si makineri votash në qytetin bregdetar ndodhet në paraburgim, pasi u arrestua me urdhër të SPAK për aferën e inceneratorëve.
Në Shkodër pritet që të angazhohen Edona Bilali, Benet Beci, Paulin Sterkaj dhe Ilir Beqaj, ndërsa Lushnja, si bashki që përfshihet në Qarkun e Fierit, pritet të ketë si drejtues fushate, Taulant Ballën, por edhe Erion Braçen.
Bashkitë që kanë mbetur pa kryetar
1- Bashkia e Shkodrës – Pasi kryetari i dalë nga zgjedhjet, Valdrin Pjetri ra në “rrjetën” e dekriminalizmit.
2- Bashkia e Vorës – Pasi kryetari Agim Kajmaku, po ashtu “u dogj” nga dekriminalizmi.
3- Bashkia e Durrësit – Pasi Valbona Sako dha dorëheqjen pas tërmetit të nëntorit.
4- Bashkia e Rrogozhinës – Pasi kryetari Haxhi Memolla ndërroi jetë.
5- Bashkia e Dibrës – Pasi Dionis Ymeri la postin për të kandiduar si deputet.
6 – Bashkia e Lushnjës – Pasi Fatos Tushe u shkarkuar nga kryeministri Edi Rama, pas arrestimit për korrupsion.
