Kryeministri Edi Rama ka nisur sot show e rradhës, në kuadrin e propagandës, duke kërkuar mendimin e qytetarëve, nëse duhet mbrojtje e veçantë sociale për nënat me shumë fëmijë apo jo.
Gjithçka është ndërtuar mbi atë që Rama e quan si Këshillimi Kombëtar, ku qytetarët mbi 18 vjeç mund të japin mendimet e tyre mbi çështje që shtron për diskutim Kryeministri.
Në pyetësor jepen tre alternative duke vënë përballë dy opsione nëse qytetarët janë pro apo kundër problematikës së shtruar ndërsa opsioni i tretë është: Nuk di të gjykoj mbi këtë çështje!
Në këtë formular janë shtruar disa çështje, ku çdo person mbi moshën 18 vjeç ka të drejtën të zgjedhë një nga tre alternativat që gjenden në formular. Rama kërkon nga qytetarët për legalizimin e kanabisit në vendin tonë.
Një tjetër pyetje është ajo e Ballkanit të Hapur. Ai kërkon mendimin e shqiptarëve, nëse kjo nismë sjell apo jo përfitime për Shqipërinë.
Si pyetje e parë është renditur a duhet bërë diferencim për nënat që rrisin 3 ose më shumë fëmijë të mitur në përfitimin e mbrojtje të veçantë sociale nga shteti.
Pyetja e dytë e zgjedhur nga Rama është nëse Shqipëria duhet të ashpërsojë dënimin e autorëve përsëritës në kryerjen e krimeve të rënda kundër personit si dhe a duhet dyfishuar dënimin për ta dhe duke hequr të drejtën e gjykimit të shkurtuar për autorët që kryejnë dhunë në familje dhe krime ndaj fëmijëve.
Po ashtu formulari përmban pyetje që lidhen me denoncuesit e pagave fiktive, a duhet të mbrohen ata nga shteti si dhe a duhet të vijojnë të punojnë ata që kanë marrës statusin e pensionistit.
Nëse do të ishte një nismë serioze, përtej show dhe propagandës, Kryeministri mund të kërkonte mendimin qytetar mbi dhunën policore apo presionet që sot ushtrohen nga institucionet shtetërore në varësinë e tij ndaj qytetarëve, mbi shkeljet e të drejtave të njeriut dhe pronës, mbi punësimin dhe meritokracinë, mbi varfërinë dhe minimumin jetik, mbi alternativat që i kanë mbetur qytetarëve të këtij vendi për të jetuar si njerëz apo sepse rinia po largohet gjithmonë e më shumë nga një vend që vret shpresën.
