Presidenti Ilir Meta zhvilloi këtë të Mërkurë një takim me Taulant Ballën, kreun e grupit parlamentar të PS-së.
Pas takimit, në një prononcim për gazetarët jashtë ambienteve të Presidencës, Meta tha se ftoi Ballën në një takim pasi ka pasur shqetësim mos shumica bojkotonte zgjedhjet.
Duke iu përgjigjur interesit të gazetarëve, Meta tha se nuk ka arsye pse të takohet edhe me përfaqësues të opozitës.
“S’ka pasur asnjë ftesë për PS, se kjo do ti bëhej o kryetarit të partisë ose sipas hierarkisë sekretarit të përgjithshëm, por ka pasur një ftesë informale por jo zyrtare me kryetarin e shumicës në kuvend që është zoti Balla meqë kemi patur disa dilema të interpretimit të procedurave lidhur me mbajtjen e datës. Qellmi im është që brenda aftave ligjore të jap kohën maksimalë për administrimin e procesit për 6 njësi që nisin në Theth dhe përfundojnë në Lushnje”, tha Meta.
”Kam patur një shqetësim mos kush e di i bojkotonte shumica”, u shpreh ai dhe shtoi se “mora garanci nga zoti Balla që janë të gatshëm për çdo datë”.
“Opozita s’mund të ankohet nëse jep një ditë apo një javë më shumë për tu përgatitu për të hyrë në zgjedhje, se dihet qeveria që është në pushtet është më e përgatitur”, vijoi.
Meta tha se dy janë datat e mundshme: 27 Shkurti dhe 6 Marsi.
Meta bëri dhe batuta me gazetarët duke e quajtur Taulant Ballën “të madhërishëm”: Zoti Taulant është i madhërishëm. Është përfaqësues edhe i shumicës, por i cakton vendin edhe pakicës.
Ndërkohë Taulant Balla, tha pas takimit me Metën se “Presidenti mendon që zgjedhjet e pjesshme mund të zhvillohen në datë 6 Mars”.
