Nga Boldnews.al
Pandemia e Covid 19 ka nxjerrë zbuluar disa nga firmat me të errët të dyshimtë kriminale, të cilat kanë lulëzuar falë edhe mbështetjes që kanë te rilinda. Një nga bizneset më fitimpurëse, e lidhur direkt me Covid, ka qenë oksigjeni spitalor.
BoldNews.al ka investiguar dhjetëra procedura të dyshimta të zhvilluara nga ministria e Shëndetësisë, kryesisht të firmosura nga Ogerta Manastirliu, e cila i jep miliona euro pa garë dy firmave GTS dhe Messer. Firma e Parë, GTS, ose Gazra Teknike Shqiptare, administrohet nga z.Besnik Halili, i cili është bashkëjetuesi i zonjës Luneda Sufali, një vartëse direkt e Manastirliut.
Sufali mban poston e drejtoreshës në Shërbimin Social Shtetëror, i cili varet direkt nga Ministria e Shëndetësisë. Nga njëra anë drejtoresha dhe nga ana tjetër burri i drejtoreshës që fiton miliona euro në tendera publikë. Por, dy firmat e oksigjenit, si GTS-ja dhe Messer kanë një bashkëpunim perfekt me njëra tjetrën, pasi në një procedurë tenderuese merr pjesë vetëm GTS-ja dhe në procedurën tjetër është vetëm Messer-i. Paratë jepen pa garë, në shumicën e rasteve me vetëm 1 pjesëmarrës në tender. Skema është përdorur për mrekulli gjatë pandemisë, në kohën kur Manastirliu, QSUT, SUT apo Senatoriumi bënin tendera me vlerë miliona euro.
Por, skema ka rifilluar të përdoret, pasi në vend janë shtuar rastet me Covid, tashmë me variantin OMICRON. BoldNews.al bëri një vëzhgim për tendera të tillë, duke krahasuar dy procedura, atë të Spitali “Koço Gliozheni” dhe të atë Spitalit të Lushnjes. Dy procedura me objekt të njëjtë; blerje oksigjen spitalor!
Sipas dokumenteve që disponon BoldNews.al, Spitali Universitar Obstetrik Gjinekologjik “Koço Gliozheni”, Tiranë, ka shpallur fitues firmën Messer Albagaz, për objektin e kontratës “blerje furnizim barna mjekësore OXYGEN”. Kërkoheshin 85.200 litra oksigjen spitalor dhe kohëzgjatja e kontratës ishte 6 muaj.
“Me anë të këtij njoftimi ju informojmë se, në këtë procedurë ka marrë pjesë ofertuesi Messer Albagaz sh.p.k, me një vlerë 11.536.080 lekë pa TVSH” thuhet në dokument. Sipas tij, vlera e ofruar nga kjo firmë është shumë afër fondit limit, ose sa 99 % e fondit të akorduar nga ky spital.
Aq më tepër, në tender ka marrë pjesë vetëm kjo kompani, duke ngritur hije të mëdha dyshimi se gjithçka ka qenë e paracaktuar. Aq më tepër, që në të tilla procedura, siç e përmendëm më sipër, futet në garë vetëm një kompani. Ose, spitalet i bëjnë procedurat që këto tender t’i fitojnë vetëm këto kompani.
Aq më tepër që në të gjitha spitalet e Shqipërisë janë montuar depozita gazi nga firma të caktuara. Për të qenë sa më të saktë: Nëse në një Spital Rajonal është montuar një depozitë nga Messer, atëherë të gjitha tenderët për blerje oksigjeni në këtë spital i fiton Messer. Nëse në spitale të tjera depozitat i ka GTS-ja, atëherë tenderët i fiton vetëm GTS-ja, madje e vetme në garë!
Më sipër faktuam se në Spitalin “Koço Gliozheni” tenderi i fitua nga pjesëmarrësi i vetëm në garë Messer. Ndërkohë, një kontratë të ngjashme ka bërë edhe Spitali i Lushnjes, në këtë rast me objekt “blerje oksigjen mjekësor”.
Fondi i akorduar ka qenë rreth 100 milionë lekë të vjetra, ndërsa në tender mori pjesë vetëm GTS-Gazra Teknike Shqiptare. Kjo firmë kishte një vlerë prej 9.996.006 lekë, ndërsa në tender nuk mori pjesë asnjë kompani tjetër. Sërish dyshohet se gjithçka ka qenë e paracaktuar!
Aq më tepër, që GTS-ja mori edhe qindarkën e fundit nga paratë publike. Dhe, skema duket se do të përsëritet, pasi në tenderë të tillë do të marrë pjesë vetëm 1 kompani.
