Alfred Rrushaj u largua nga posti i kreut të Grupit Parlamentar të PD, në një kohë kur përplasjet në këtë parti mes Lulzim Bashës dhe ish-Kryeministrit Sali Berisha e mbështetësve të tij kanë shënuar kulmin.
Pas protestës së 8 janarit, kur ndaj disa mijëra demokratëve që kërkonin largimin nga zyra e kreut të PD-së të Lulzim Bashës, u hodh gaz lotsjellës dhe lëndë të tjera toksike, fillimisht nga mbështetës të Lulzim Bashës dhe më pas nga Policia e Shtetit, pati një reagim të fortë të Komisionit të Rithemelimit në akuzat publike ndaj deputetit Basha.
Ky i fundit, i cili nuk njeh asnjë nga vendimet për shkarkimin e tij, ka vendosur të përjashtojë nga partia të gjithë anëtarët e Komisionit të Rithemelimit, si dhe çdo emër që i ka dalë kundër në përplasjet në PD.
Dhe duket se me vendimet e Bashës, Alfred Rrushaj nuk ka qenë dakort, madje sipas raportimeve ai nuk ka votuar në mbledhjen e asaj që nga Lulzim Basha, quhet Kryesia e PD.
Rrushaj i ka paraqitur Bashës dorëheqjen nga funksioni i kreut të Grupit Parlamentar, ndërsa ditën e djeshme u caktua Enkelejd Alibeaj në këtë funksion, i cili është një nga mbështetësit më të flaktë të çdo vendimi të marrë nga deputeti Basha, edhe pse ato konsiderohen “nul”.
Nga raportimet mësohet se Rrushaj ka ndjekur një linjë të moderuar në të gjitha qëndrimet e tij, madje ka refuzuar që të dalë publikisht dhe të anatemojë, sulmojë apo artikulojë qëndrime, kundër atyre që Lulzim Basha i konsideron si “armiqtë” e tij brenda rradhëve të demokratëve. Në kushte të tilla, duket se zgjidhja e gjetur ishte largimi i Rrushajt nga posti i kreut të Grupit Parlamentar, ndërsa Gazment Bardhi ditën e djeshme, justifikoi largimin me gjendjen e rënduar shëndetësore të RRushajt si pasojë e Covid.
Në fakt justifikimi i përdorur nga Bardhi rezultoi një gënjeshtër, pasi Rrushaj gëzon shëndet të plotë, dhe ai kishte kaluar Covid pak javë më parë. E ndërsa Bardhi artikulonte në media se Rrushaj ishte i prekur nga koronavirusi, madje përcaktoi edhe gjendjen e rënduar shëndetësore të tij, deputeti demokrat udhëtonte jashtë Shqipërisë, në një nga vendet e Rajonit për çështje private, sikundër gëzonte shëndet të plotë.
