Partitë italiane të qendrës së djathtë konfirmuan të premten se donin që Silvio Berlusconi të ishte presidenti i ardhshëm i Italisë dhe thanë në një deklaratë të përbashkët se do të kërkonin mbështetje të gjerë për të në parlament.
“Udhëheqësit e koalicionit kanë rënë dakord që Silvio Berlusconi është personi i duhur për të mbajtur këtë detyrë të lartë në këto kohë të vështira”, thanë shefat e qendrës së djathtë pas një takimi në vilën e Berlusconit në Romë.
Partia Demokratike (PD) e qendrës së majtë të Italisë, e cila ka përjashtuar kategorikisht mbështetjen për Berlusconin në krye të shtetit, ka thënë se ishte “e zhgënjyer dhe e shqetësuar” nga vendimi.
Votimi mes më shumë se 1 mijë parlamentarëve dhe delegatëve rajonalë fillon më 24 janar, me Berlusconin që mund të stopojë kryeministrin Mario Draghi për të marrë postin prestigjioz.
Asnjëri nga dy blloqet kryesore nuk ka mbështetje të mjaftueshme për të mposhtur njërin kandidat për kreun e shtetit dhe PD u ka bërë thirrje të gjitha partive që të përpiqen të ndërtojnë konsensus rreth një figure që nuk është aq përçarëse sa Berlusconi 85-vjeçar.
“Lëvizja 5-Yje”, e cila ka numrin më të madh të parlamentarëve, përsëriti të premten se nuk mund të mbështeste kurrë Berlusconin, i cili është dënuar për mashtrim tatimor dhe ende përballet me gjykata lidhur me festat e tij seksuale “bunga bunga”.
“Sot është e nevojshme të lihet mënjanë përkatësia partiake, të gjitha forcat politike duhet të bashkohen në një figurë që mund të përfaqësojë italianët dhe vendin”, ka thënë nënkryetari i “5 Yjeve”, Mario Turco.
Edhe pse nuk ka kandidatë formalë në zgjedhjet presidenciale, Berlusconi ka bërë fushatë të palodhur në prapaskenë për të bindur ligjvënësit të votojnë për të dhe ka mobilizuar perandorinë e tij mediatike pas ofertës së tij.
